Merkezê Îrtîbatî û Çapemenîye yê HPGyî  derheqê çalakîyanê gerîlayan de eşkerayîye daye û vat çarçewa Hemleya ''Dem Demê Azadîye yo'' de çalakîyê gerîlayanê HPG û YJA Starî yê vera îşxalkeran dewam kenê.

Eşkerayîye de nê ameyî parekerdene:

''Hêzanê Pawitişî yê Hewayî yê Şehîde Delale 4 û 5 gulane de Qilê Zendûra yê Metîna de 3 reyî da îşxalkeran ro. Çalakîye de hedefî hewayî ra serkewte ameyî pirodayene.

Çarçewa ''Hemleya Şorişgêre ya Cengê Xabûrî'' de;

4ê gulane de artêşa tirke vera mewzîyê şerî yê Qilê Zendûra yê Metîna bombardûmanê giran kerdî û waşt ke aver şiro.Hêzanê ma mudaxaleyê înan kerd û pêkewtişê giranî ciwîyayî. Îşxalkeranê ke hêzanê ma ra derbê pîlî werdî mecbur mendî ke gamêke peyser agêrê.

5ê gulane de Qilê Şehîd Çîyayî yê warê Zendûra yê Metîna de gerîlayanê YJA Starî 9 îşxalkerî girwtî binê kontrolî û dima da piro. Çalakîya serkewîye de 7 îşxalkerî ameyî cezakerdene û 2 îşxalkerî zî birîndar bîyî. Badê çalakîyê îşxalkeran pê hekîkopteran merde û birîndarê xo kiriştî.

Çarçewa ''Hemleya Şorişgêre ya Bazanê Zagrosî'' de;

6ê gulane de hêzanê ma qezaya Çelê ya Colemêrgî de vera Qereqolê Girê pê çekanê giranan çalakîye kerde. Çalakîye de hedefî ameyî pirodayene la hûmara merde û birîndaran nêameye tesbîtkerdene.

Derheqê hêzanê PDK û Iraqî de;

4ê gulane de hêzê sînorî yê ke bi nameyê pêşmergeyan û Iraqî têgêrenê qilêkê mabênê Binavya û Bêdehê yê Metîna û qilêkê mabênê Teşîya û Qumrîye de ameyî cakerdene. Vera nê hêzan çîyêk nêame kerdene. Seba ke amanc û nîyetê înan bêro fehmkerdene ma înan teqîp kenê.

Hêzanê ma Sîdekan de hêrişê pêşmergeyan nêkerd

Tay organanê medya de ame vatene ke warê Sîdekanî yê Xinêre de hêzanê ma hêrişê hêzanê pêşmergeyan kerdo. Nê xeberî raşt nîyê. Hêzanê ma hêrişê pêşmergeyan nêkerd. Ma sey Gerîlayanê Azadîye yê Kurdîstanî vera îşxalkeranê Kurdîstanî xoverdayîşê tarîxî danê. No xoverdayîşêko bimbarek û neteweye yo. Ma pawenê ke pêşmergeyê Kurdîstanî zî tewrê nê xoverdayîşî bê. Hetkarîye mekerê zî qenî wa cayê hêzanê ma teng mekerê.  Çunke nê tewirî xizmetê şarê kurdî nêkenê. Ma na babete de her kesî ra tewirêko netewe pawenê.

Hêrişê hewayî

5ê gulane de Qilê Zendûra yê Metîna hetê teyrayanê şerî yê tirkî ra ame bombardumankerdene. Nê hêrişanê giranan ê artêşa tirke de vînîbîyayeyê ma çîn ê.''