Fermandaranê YJA-Starî ra Gulane Avaşîn ard ziwan ke operasyonê vera înan normal nîyê û vat: ''Ma nika Avaşîn de çeper de yê. Şero ke dewam keno seba ma rewşêka newîye nîya. Tarîxê têkoşînê ma de xeylêk operasyon û şerî qewimîyayî. Vera operasyonan her tim p3e ruhê Apogîrî xoverdayîş ame kerdene û derbê giranî dîyayî artêşa tirke ro.

Gulane Avaşîn operasyonê 'Pençe-Yildirimî'yo ke 23ê nîsane de dest pêkerde wina ercna: ''Operasyon de taktîkê nazîyan şuxilîyenê. Pê helîkopteranê kobra, skorsky û teyarayanê şerî hêrişanê giranan kenê. Labelê hêzê gerîlayan nêmaneno hêzêkê bînî. Destpêkê operasyonî ra nata embazan derbê giranî dayî dişmenî ro. Mamreşo, Mervanos, Metîna û Zap de pê ruhê zîlane têkoşîn yeno kerdene.

Leşkerê tirkî rewşa trajîkomîke de yê.Eke pel bileqo bombarduman kenê. Hukmatê şerî têna koyan de nê her cayê Kurdîstanî de wina têgêreno. Goreyê înan her cinîya kurde bombaya gandar a, her ciwano kurdî zî milîtanêk o. Coka artêşa tirke vurîyaye artêşêka şîzofrenî.

Hukmatanê bînan zî pê heman metodan hêrişê gerîlayan kerd. Labelê înan ra qet yew zî ser nêkewt. Gerîlayê Herêmanê Pawitişî yê Medya pê ruhê hêrişî têgêrenê. Ma her hele do bidê înan ro û înan poşman bikerê. Merdim encax pê pawitişê erdê xo eşkeno cuya xo manadar bikero.Ma do pê perwerîya erdê xo derbanê giranan bidê dişmenî ro. Hêzê ke xîret kenê paradîgmaya Rayberîye û têkoşînê ma çi bikerê wa ney bizanê; ya ma do ser bikewê ya ma do ser bikewê. Ma sey gerîlayanê YJA-Starî rayberîya şerî kenê û nêverdenê ke artêşa tirke û çeteyê ci erdê ma de bi asanî nefes bigêrê. Ma do pê hîşmendîya cinîyan tewrê şerî bibê.''