Gerîlayanê YJA Starî Faraşîne Miştenûr û Besê Anûş bi wesîlêya 8ê Adare Roja Cinîyan a Dinya ANFyî rê erjnayîşî kerdî.

Faraşîne Miştenûr  vist vîrî ke 8ê Adare bi têkoşîn û netîceya bedelan de ame destfînayene û vat: ''Têkoşînê cinîyan seserran ra nata dewam keno. Ewro hêzo ke komelî rê serkêşîye keno cinîyî. Nê semedî ra heme têkoşîn û xoverdayîşê pîlî serkêşîya cinîyan de yenê rayraberdene. Cinîyê kurdan zî xeyrê fîkr û felsefeya Rayber Apoyî têkoşînê cinîyan de bîyî hêzo serkêş. Tarîxî ra îşxalkerî tim hêzê cinîyan ra tersenê. Çunke cinîyî komel de şoriş kenê. Hinî hayîya cinîyan zî bi hêzê înan est a. Sîstemê camêrdê serdestî de hêzê cinîyan ame înkarkerdene û cinî çîn hesibîyaye. La ewro ma vînenê cinîyan senî destkewteyê pîlî fînayî dest.

Dişmen bitaybetî cinîyan ê ciwanan hedef geno. Ganî cinîyê ciwanî  kayê îqtîdar û sîstemê kapîtalîstî rê mexapîyê, binê tesîrê şerê taybetî memanê û çarçewaya felsefeya Rayber Apoyî de komelî rê serkêşîye bikerê. Xora çalakîyê gerîlayanê cinîyan zî nê prosesî ser o tesîr keno. Têkoşîn û çalakîyê ke gerîlayî şertanê zehmetan kenê komelî ser o zî tesîr keno. Dişmen vera çalakîyanê gerîlayan û xoverdayîşê şarî de bin kewt. Dişmeno ke nêeşkeno xoverdayîşê koyan bişikino polîtîkayanê şerê taybetî fîneno dewre.  Xoverdayîşê gerîlayan do bi xurtbîyayîşî dewam bikero. Waştişê ma yo esasî azadîya fîzîkîye ya Rayberîye û xelisnayîşê Kurdîstanî yo. Ganî ciwanê ma verê xo bidê refanê gerîlayan. Heta ke cinî azad mebo komel nêeşkeno bibo azad.''

Besê Anûş zî derheqê 8ê Adare de nê vatî: ''Ez sere de heme şehîdanê ma yê ke semedê azadîya cinîyan ganê xo feda kerd, bi rêzdarî yad kena. Bi têkoşîno ke bi serran o dewam keno cinîyî hinî dahîna hêzdar, zanaye û rêxistenkerde yê.  Cinîyan sîstemê camêrde serdestî de zaf dej ant. Coka ganî cinîyî tim vera nê sîstemî pîya têkoşîn bikerê. Rayber Apoyî jineolojî semedê pîya têkoşînkerdişê cinîyan pêşnîyaz kerd. Îqtîdarî wazenê qirkerdiş û hêrişanê vera cinîyan bidomnê. Ma sey cinîyan ganî tim rêxistinkerde vera nê hêrişan têkoşîn bikerê. Eke ma pîya têkoşîn bikerê ma eşkenê tarîx de rolêkê xurtî kay bikerê. Çalakîyê ke serkêşîya YJA Starî de Herêmanê Pawitişî yê Medya yenê kerdene moral û hêz danê ma. Ma nika serkewtişî rê dahîna nêzdî yê. Ma do çirey herra xo îşxalkeran rê meverdê.''