Serekdoktorê Nêweşxaneyê Dewlete yê Farqînî Zekî Tanrikuluyî 2yê êlula 1993yî de ame qetilkerdene. Kênaya ey Seda Tanrikulu serrgêra şehadetê ci de ANFyî rê qala babîyê xo kerde.

Seda Tanrikulu pare kerd ke babîyê şar û welatê xo ra zaf hes kerdêne û bi nê heskerdişî Çanakkale ra agêrayo Farqînî. 

Seda Tanrikulu vat: ''Babîyê mi Çanakkale de serrêke xîret kerd ke tayînê xo bigêro Farqînî la nêbi. Babîyê mi karmendîya dewlete ra îstîfa keno û Farqîn de xo rê muayenexaneyêkî akeno. Babîyê mi vano ke şarê ci hewceyê ey o, ganî o xizmetê şarê xo bikero. Dima babîyê mi bi serdoktorê Nêweşxaneyê Farqînî la muayenexaneyê xo zî nêqefilna. Babîyê mi her kesî rê ardim kerdêne, bêpere dermanî dayêne şarî. O doktorêko zaf fedakar bi. Her kesî babîyê mi ra zaf hes kerdêne. 

O çax serrê 90an bîyî. Her roje vengê çekan ameyêne. Ez tim hetê babîyê xo de şîyêne her ca. Mi çend reyî pê çimanê xo dî ke polîsan babîyê mi ra gefî wendê. Babîyê mi tim nêweşan de bi kurdkî qisey kerdêne la polîsan no nêwaştêne. Çend reyî zî gerîlayê birîndarî ameybî ardene nêweşxaneyan. Babîyê mi rixmê tedayan zî gerîlayî tedawî kerdêne. Babîyê mi seba ke kurd bi ame qetilkerdene. 

Yew hezîrane de ez, babî û dadîyê mi mîyanê wesayîtî de şîyêne kişta Gola Hazarî. O çax vera wesayîtê ma hêrişo çekdar amebi kerdene. 10ê hezîrana 1992yî de Farqîn de Doktor Emîn Ayhan ame qetilkerdene. Babîyê mi zî hedef de bi. 

Dadîya mi waştêne ke ma Farqînî ra şorê. La babîyê mi qebul nêkerdêne û vatêne 'Gonîya mi gonîya farqînijanê bînan ra hîna sûr nîya. Ez zî kurd a. Eke ez şora zî ê do mi bikişê. La eke tîya de ê mi bikişê şarê ma do bizano ke çira kişîyaya.' 

Babîyê mi, hetê mi de kişîya. Rojbîyayîşê min ra 5 rojan dima bi. Ez 9 serre bîya. Ma seba ke mi rê kitaban bigêrê şîyêne merkezê Amedî. Babîyê mi verî do bişîyêne muayenexane. Ez bermaya, peyê ci rê şîya. Mabênê ma de 10 metreyî est bîyî. O çax babîyê mi dîya guleyan ver. Ez û dadîya mi ma vazdayî. Ez qîraya mi va ke kiştoxî cêrî ra şinê. La polîsî cêrî ra nêşîyî, înan çeke ante ver bi keyeyan. Pêro farqînijî vejîyayî teberî. Şar babîyê mi girewt verarê xo berd nêweşxane. O çax saete 17 ra dima çew nêvejîyayêne teberî. La a roje şarî nêweşxane, verê asayîşî û rayîrî girewtbî.

Nêweşxane de polîsan dezayê babîyê mi ra nêngî çinayî, da ey ro. Amikanê ma waşt ke ez babîyê xo bivîna. La polîsan mi rê zî nêngî çinayî. Dima pêro keyeyê ma ame destbendkerdene. Polîsan nêverda ke babîyê mi dewe de û goristanê şehîdan de bêro definkerdene. Babîyê mi goristanê endamanê Hîzbullahî de ame definkerdene. Babîyê mi pê destê Hîzbullahî hetê dewlete ra ame qetilkerdene. 

Serran ra pey rojêke televîzyon de ma dî ke kiştoxê babîyê mi Cemîl Meygî sînorê Pirsûsî de tepişîyayo. Ey qebul kerdo ke babîyê mi zî tede 7 kesî qetil kerdbî. La dima no kes vera dîya. O kiştox zî Farqînî ra bi. Hîzbullahî qetilkerdişê babîyê mi girewt xo milî la dewlete babîyê mi qetil kerd. 

Prosesê nê weçînayîşan seba mi zaf zehmet bi. Îqtîdarê AKPyî kiştoxan de îtîfaq kerd û Hîzbullah kerd Meclîsî. Ewro Huda-Par vano ke ê perwerdeyê bi ziwanê kurdî, federalîzm wazenê. La o çax çima Hîzbullahî ê merdimê ke heman çi waştêne kiştî? AKP zî sey înan kiştox o. 

Wexto ke babîyê mi kişîyabi yew birayê mi est bi, dadîya mi zî digan bîye. Mi wextêk qala babîyê xo înan rê nêkerde. Babîyê mi yeno mi vîrî, mi o şinasna. La înan babîyê mi nêdî. Nika yew kênaya mi est a. La hesreta babîyê mi hema zî zerrîya mi de ya. 30 serrî qedîyenê. Her serre serrgêra qetilkerdişê ci de xeylêk merdimî şinê gorê babîyê mi ser. Ma şa benê ke ma domanê babîyê winayênî yê!''