Netîceyê teroro ke dewleta Tirkî serra 1990’an de seba ke teslîm bibê hemverê dewanê Kurdan de bica ard, dewî vêşnayî û koçberîya bizore ferz kerde, şarê Botanî ra qismêk Vakûrê Kurdistanî ra ravêrtî Başûrê Kurdistanî.    Înan rixmê zehmetîyanê ke Etrûş ra heta Nînova û ûca ra heta Mexmûr antî pes nêkerd.

Gama ke ma sey Şopên Rojî raywanîya xo domnenê ma Kampa Mexmûrî de kesê ke Ocalanî dir vîrameyîşê înan estê, rastê înan ameyî. Nînan ra yew zî Ramazan Bozan o ke ma rê qalê 1995 de reya ewilêne pêvînayîşê xo û Ocalanî û tesîrê nê pêvînayîşî cuya ê ser o senî bîyo kerd.  

ETRÛŞ RA VER BI SEHAYA RAYBERÎYE

Ramazan Bozan 1995 de gama ke Etrûş de bîyo îdareyî veng dayo înan û vato ke grûbêk do şiro sehaya Rayberîye û înan o zî munasib dîyo. Sere de ê îtîraz kerdo, çunke fikirîyayo ke tayê embazê bînî yê ke hîna zaf heq kenê estê. Bozanî vat, “Labelê embazan wina munasib dîbi û ma bi heyecanêkê pîlî bi grûbêka embazan kewtî rayîr.” Bozanî vat ê raywanîyêka derge ra dima resayê seha û dewam de nê pare kerdî: “Dimayo ke embazan ma bica kerdî ma seba werê nêmroje şîyî serê sofreyî. Reya ewilêne ma do Rayberîye dir wer biwerdêne. Vero ke ma ravêrê werî Rayberîye yew bi yew nameyê ê kesanê ke ameybî, ça ra ameybî bi hawayêkê bidetayî persa. Dima ra ma ravêrtî werî. Rayberîye hende xozayî têgêrayêne ke gamêk ra dima ê heyecanê zereyê ma zî cayê xo xozayîye rê verdayêne.

SERE DE KERDÊNE LETE LETE, DIMA ARÊ DAYÊNE

Problemî û kesê ke birpoblem bî bi heme hawayî girewtêne xo dest, lete lete ser o vindertêne û vernîya ma de ronayêne. O ferd zî bi nê hawayî detayanê xetayanê xo mûsayêne û zanayêne ke nê xetayî ra ça ra yenê.  Tabî dima ra zî bi hawayêkê yewkerdişî û awankerdişî o kes qetî ardêne xo ser. Gama ke derheqê ferdan de qerarî girewtêne seha de vernîya her kesî de fikrê înan persayêne.

KRÎTÎKÊ Ê YÊ SEBA KOMA BERXWEDANÎ

Rojêk Aram Tîgran û embazê hunermendî yê bînî ameybî seha. Ez vana qey Koma Berxwedan zî tede estbî. Rayberîye vat, ‘Aram bi keda ke daya berdarîyêk fînaya dest û keno ke nê pêşkêşê şarî bikero. Çi destê ê ra yeno keno la şima destê şima de hende îmkanî estê, hende şehîdî estê û xasekîyî estê şima nêeşkenê înan ê destê xo biercnê.’ Nê vatişê êyê peyênî xusûsen seba Koma Berxwedanî bîyî. Înan rê çîyanê ke eşkayêne bikerê zî vatêne. Mesela cuya koyî nimûne ramotêne. Qalê dimayê hende keda ke koyan de dîyaya û pê cuya xaseke ameya afernayene û ercan kerd û ard ziwan ke ganî nê hunerî dir pîya bêrê ercnayene.

KAMPÊ ŞIMA DO BIBÊ MEWZÎYA MUCADELEYÎ

Nizdê 6 mengan ra dima ma do sehaya Rayberîye ra hendî bişîyêne. Rayberîye grûba ma ra tek tek xatir waşt û tewr peynî de ma ra nê vat:  ‘Kampa Etrûşî û kampê dimayê înan ganî açarîyê mewzîyêka mucadeleyî. Nê merdimanê ma heme zehmetîyî dayî verê çiman û kewtî rayîr û ganî tîya ra tepîya zî bi mucadeleyêkê pîlî wayîr vejîyê.’

Rayberîye heta ma ûca ra bi temamî dûr kewtî zî dest ma rê têşanayêne û ewnîyayêne ma ra. Cuya mi de şopê tewr xorîyî ê gamî bî. Ez û keyeyê xo heta estbê ma do nê vîrameyîşan rê wayîr vejîyê.”