Vervatoxa HDPyî Ebru Gunay kombîyayîşê çapmenîye yo hewtene kerd. Gunaye rojdem ercna û vera operasyonanê  qirkerdişê sîyasîyî nêrazîbîyayîşê xo mojna.

Qiseykerdişê Gunaye ra beşêk wina yo:

''Ewro operasyonanê qirkerdişê sîyasîyî reyna dest pêkerd. Teda, bêhuqûqî, destbendkerdiş û nê operasyonî ma hînî şaş nêkenê. La têkoşînê ma pîlêr kenê. Embazê ma yê ke ewro ameyî destbendkerdene ganî cade bêrê veradayene. Ganî paynîya na bêhuqûqîye bêra ardene. 

Operasyonê vera Komeleya Cinîyan a Rosa seba dewamê şîdetê vera cinîyan mesajêk o û pawitişê kiştoxan o. Teda û zorbazîye pê têkoşînê ma yê cinîyan nêeşkenê. Têkoşînê ma sînoran nas nêkeno. Ewro zî nas nêkeno, siba zî do nas nêkero.

Çar hetanê Tirkîya de gorî yenê rijnayene. Menga Remezanî de dadîyêke verê gorê domana xo de nobete gêna. La îqtîdarî hêrişanê vera goran ra fek vera nêda. Eşkera bi ke cenazayê ke Goristanê Xerzanî yê Bedlîsî ra ameybî remnayene Dezgehê Tipê Edlîyî yê Îstanbulî Goristanê Kîlyosî de kişta rayîrî de bi hawayêkê komkîyî ameyî definkerdene. Bi nê hawayî keyeyê ke cenazayê înan ameybî remnayene reyna yenê cezakerdene. Gorî erjê hemparî yê komelî yê, fîraz ê. Goreyê Îslamîyetî goran rê hûrmet bêro mojnayene. La AKP se keno? Hêrşanê vera fîrazîyan dewam keno, cenazayan kişta rayîrî de defin keno. Oyo ke kişta rayîrî de ame definkerdene wijdan, exlaq û merdimîya îqtîdarî yo. No şar ney do xo vîrî ra nêkero û hesabê ci biperso.''