Hemserekê Pêroyî yê  Partîya Demokratîke ya Şaran (HDP) Mîthat Sancarî çerçeweya Programê Têkoşînê Demokratîkî de yê partîya xo de Amed zîyaretkerdişî kerdî. Sancarî verî Kongreya Komelê Demokratîkî (KCD) zîyaret kerd û hetê Hemserekê Pêroyî yê KCDyî Berdan Ozturk û Hemsereka Pêroyî ya DBPyî Salîha Aydenîz ra ame vervazîkerdene.

Sancarî  qiseykerdişê xo de bale ante polîtîkaya qirkerdişî ya vera şarê kurdî û HDPyîjan ser û vat ma çirey verê zextan de mile xo çewt nêkerd do ewro ra tepîya zî milê xo çewt nêkerê. Sancarî  hêzê têkoşînê azadîye yê kurdan vist vîrî û vat ma wayîrê tecrube û bawerîya girde yê ke pê înan ma do têkoşîn bikerê û ser bikewê.

Sancarî derheqê  programê rayraşîyîşî de nê vatî: ''Rayraşîyayîşê ma do Colemêrg û Edîrne ra  do qolan ra bêro destpêkerdene û nê qolê rayraşîyîşî do Anqara de bêrê têhet. Parlamenter û îdarekarê partîya ma do nê rayraşîyî de ca bîgêrê û  bajaranê ke ekîbê ma tira ravêrenê do kombîyayîşê şarî bêrê viraştene. Rayîrê mabênê bajaran de ma rayra nêşinê pê wesayîtan ravêrenê. Hemserekê ma yo verên Selahattîn Demîrtaş Edirne de û Leyla Guvene zî Colemêrg de ameybî vîjnayene. Ez do qolê Çolemêrgî de  Hemsereka ma ya Pêroyîye Pervîne Buldan zî do qolê Edirne de ca bîgêro. Ma do rayraşîyayşî de derheqê polîtîkaya xo û plan projeyanê xo de zanayîş bide û tewr peynî Anqara de kombîyayîşê hewayê akerdeyî bikerê û rojdemî biercnê. Detayê programî do bêrê parekerdene.''

Sancarî êyê ke vera HDPyî provokasyonan amade kenê hîşyar kerdî û vat: ''Partîya ma çirey malzeme nêdana provokasyonan û kayanê leyminan rê nêxapîyena. HDP parîtya demokratîke û bihêz a û wayîrê tecrubeyê têkoşînî ya. Ma reyna veng danê heme hetanê demokratîkan ke wa têkoşîno hempar bêro girdkerdene. Pêvînayîşanê Amedî de ma do partîyanê kurdîstanî û dezgehan zîyaret bikerê û semedê îtîfaqê neteweyî pêvînayîşan bikerê. Seke yeno zanayene hedefê hêrşanê faşîstan şarê kurdî û cografyaya kurdan a. Coka kurdî ganî hêzê xo bikerê yew û cewabê nê hêrişan bidê. Eke kurdî bibê yew û şarê bînî pîya têbigêrê vernîya ma akerde ya û ameyoxê ma ronş o.''