HDPyê startê Rayraşîyayîşê Demokrasîyî Colemêrg de da.  Hemserekê HDPyî Mîthat Sancar, Hemserekê KCDyî Berdan Ozturk, Hemsereka DBPyî Salîha Aydenîz, Hemvervatoxê HDKyî Sedat Şenoglu, Hemsereka SYKPyî Canan Yuce, Hetkarê Hemserekanê ESPyî Beycan Taşkiran, endamê Meclîsê Rayberdişî yê HDPyî, wekîlî, endamê HDPyî serê sibayî verê bînaya partîye de seba startî  kom bîyî.

Wekîlan û terefgîranê partîye yê ke zereyê bîna de bîyî pê dowîzan û kincanê bi nuşteyê ''Pêro pîya'', pê sloganananê ''Biciwîyo xoverdayîşê HDPyî, Vera faşîzmî mil bi mil, Darbeker AKP'' Sancar û heyetê ci pêşwazî kerdî.

Destpêkerdişê rayraşîyayîşî ra verî serê sibayî pêro şaristan hetê polîsan ra gêrîya binê ablûqa. îmê taybetî û sekbanî zî verê dezgehanê dewlete de ameyî cakerdene. Çar hetanê şaristanî de wesayîtê zirxînî û polîsî estê.

Rixmê nê çîyan zî startê rayraşîyayîşî pê eşkerayîye ame dayene.

Sancar:  ''No îqtîdar darbeker û xespker o.''

Mîthat Sancarî rayraşîyayîşî ra verî verê bîna de eşkerayîye daye û nîşanê abluqaya polîsan da. Sancarî vat: ''Nêverdanê ke ma berê têhet la çew nêeşkeno yewîya ma biheremno.  Rayraşîyayîşê ma vera darbe yo. Pêro darbekerî hêverî îradeyê şarî xesp kenê. Îqtîdar pandemî bahane keno destûr nêdano ma. La vera pandemîye sewbîna tedbîr nêgeno. Ma tîya de yê ke meseleya kurdan pê demokrasî çareserîye bikerê. Rayraşîyayîşê ma wayîrvejîyayîşê îradeyê şarî yo.  Polîtîkaya qeyûmî darbeyêka tewr pîlêr a. Destsernayîşê qeyûman çinkerdişê îradeyê şarî yo. Seba ke ma nê îradeyî bipawê tîya de yê.

Polîtîkaya qeyûmî heman wextî de hêrişê vera rûmetê şarî yo. No têkoşîn têkoşînê rûmetê kurdan o. Xizmetê şaredarîye ra wedaritişê kurdkî hêrişê vera kurdkî yo. Têkoşînê wayîrvejîyayîşê ziwan û nasnameyê ma têkoşînê rûmetî yo. No rayraşîyayîş seba edalet o. No îqtîdar darbeker û xespker o. Ma seba Leyla Guven û Musa Farisogullari, Selahattîn Demîrtaş, Fîgene Yuksekdag, Abdullah Zeydan, Gultene Kişinak rayîrî ra şinê. Ma seba rojnamegeranê tepişteyan şinê.

Ma vengê îqtîdarî danê ke meseleya kurdan pê bombayan, tank û şîdetî çareser nêbena. Bêrê ma seba haştîye, çareserîya demokratîke ya meseleya kurdan rayîrî ra şorê. 

Xîret kenê ke HDP sey partîyêka provakatîfe bimojnê. La HDP do destûr nêdo naye. Nêverdenê ka ma eşkerayîyêke bikerê. Ma seba sîyasetî isrardar ê. Ma do qet zemînê sîyasetê demokratîkî ca nêverdê. Ma soz danê ke ma do vera hîşmendîya darbekere seba nê welatî haştîye bîyarê ca. 

Ma venga pêro şaran danê ke ma do na rewşe pîya bivurne. Hêzê ma esto, ganî têna ma pê xo bawer bibê. Merdimê nê welatî nê îdarekerdişî heq nêkenê. Peynîya nê rayîrî azadî, edalet, demokrasî û haştîye ya.

Heta ke ma şarê xo reyde bibê ma do bin nêkewê. Ma xoverdayîş hol zanenê. Nika wextê serkewtişî yo. Wext wextê awanîya haştî, edalet û azadîye ya. Seba naye çi destê ma ra bêro ma do bikerê.''
Qiseykerdişî ra dima Sancar û heyetê ci seba rayraşîyayîşî ver i wesayîtanê xo şîyî. La polîsan pê bendan ê asteng kerdî. Terefgîrê HDPyî hema zî pawenê.