Platformê Kede û Demokrasîyî yê Amedî bale ante ser ke tay hetî bi nêzdîbîyayîşê weçînitişê cayîyî kenê ke erjanê kurdan ser o rant bifînê dest û vera hedefgirewtişê Şêx Seîdî bi vatişê ''Hadê xo bizanê'' nêrazîbîyayîş mojna.
Partîya Haştîye û Demokrasîyî (BDP) 2011 de nameyê Şêx Seîdî dabi bûvarêkî. Demê peyênî de naye ser o vera Şêx Seîdî hêriş û heqaretî yenê kerdene. Platformê Kede û Demokrasîyî yê Amedî Meydanê Şêx Seîdî (Dagkapi) de eşkerayîye daye.
Hemserekê KCDyî Berdan Ozturk, îdarekarê DBP û DEM Partî û xeylêk kesî tewrê eşkerayîye bîyî. Eşkerayîye de pankartê ''Bi ziwanê xo yê leyminî ziwanê xo erjanê şarê kurdî rÊ derg mekerê'' ame akerdene û slogana sey ''Şêx Seîd rûmetê nê şarî yo'' ameye vatene.
Eşkerayîye de nê ameyî vatene: ''Şêx Seîd û embazanê ci têkoşînê heq û edaletî rayra berd. Coka o wext raştê zulmê zîhnîyetê serdestî ameyî, ameyî îdamkerdene û hema zî cayê mezalanê înan nîno zanayene. Şêx Seîd sey Seyîd Riza û Nurî Dersimî erjanê muhîman ê şarê kurdî ra yew o. Seba ke nameyê ci dîyayo nê bûlvarî vera Şêx Seîd û embazanê ci hêrişê nîjadperestî yenê kerdene. Ma nê eşkerayîyanê hêrişkar û xelatan qebul nêkenê.
Îqtîdar 20 serrî yo polîtîkaya seserre ya komare dano domnayene û hema zî cayê mezalan yeno nimitene. Şaredarîyê qeyûmû û hemkarê herêmî zî bi nêzdîbîyayîşê weçînitişê cayîyî na mesele ser o kenê ke rant bifînê destê. Seba ke ma seserra bine vîn mekerê, seba ke haştîye bêro na herre ganî her kes hadê xo bizano û hasîyetanê tarîxî û erjanê şarî rê hurmet bikero.''
