Pawitoxa heqanê cinîyan û aktîvîsta feylije Şehla Hefîd ANFyî rê qisey kerd û vera hêrişanê dewleta tirke yê serê Başûrê Kurdîstanî nêrazîbîyayîşê xo mojna. Şeyla Hefîd bale ante ser ke Peymana Lozanî 2023 de qedîyena coka Tirkîya wazena abigêra sînoranê Mîsak-i Mîllî.

Hefîde ard ziwan ke heta ke Qanûno Bingeyî yê Tirkîya nêvurîyo çîyêk Tirkîya de nêvurîyeno. Hefîde vat: ''Hukmatê Tirkîya kurdan sey terorîstan vînena. Serra 1983î de wexto ke mabênê YNK û Iraqî de şer estbi Tirkîya Iraqî reyde peymanêke kerde. Goreyê na peymane Tirkîya eşkena qasê 15 kîlometreyan bikewa sînoranê Iraqî. Nika zî Tirkîya pê na made dekewta Başûrî. Hêzê Îranî zî vera kurdan sey Tirkîya têgêrenê.

Tirkîya zaf tehlukeyîn a û dişmena tewr tehlukeyîn a kurdan a. Çunke Tirkîya kurdî kamca de estbê hêrişê uj kena. Tirkîya pê teda û waştişî PKK xeylêk welatan de girewt mîyanê lîsteya terorî. Nika vera hêrişanê serê Başûrê Kurdîstanî ganî hukmatê Başûrî û Iraqî vengê xo vejê û bikerê ke peymana 1983î betal bikerê. Ganî pêro kurdî bizanê ke hêrişê Tirkîya zaf tehlukeyîn ê û hêrişê qirkerdişê kurdan ê. Kurdî Şorişê Rojawanî û xoverdayîşê vera DAÎŞî ra dima pêro dinya de şinasîyayî. Her wextî ra zêdêr kurdî wayîrê dostan ê.''

Hefîde eşkera kerd ke kurdî her wextî ra zêdêr baldar û hişmend ê û vat: ''Her wextî ra zêdêr ma wayîrê muhîmat û çekan ê. Tek kêmasîya ma esta; dişmenê ma vera ma benê yew la ma xo mîyan de vera înan yew nêbenê. Ganî pêro partîyê kurdan bêrê yewca û mesuldarîyanê xo bîyarê ca. Seba ke verê nê tehlukeyî bêro girewtene ganî pêro kurdîstanijî bibê yew û çalakîyanê girseyîyan bikerê. Sere de bi ereban kurdî ganî dostanîya xo bi şaran bihêzêr bikerê û vera tehlukeyê çinbîyayîşî destkewteyanê xo bipawê.''