23yê tebaxe de Silêmanî de rojnamegerî Gulîstane Tara û Hêro Bahadîn hêrişê dewleta tirke de şehîd bibî. Roniştoxanê Kampa Multecîyan a Şehîd Rûstem Cûdîyî ya Mexmûrî ANFyî rê qisey kerd û hêrişê vera rojnamegeran ê cinîyan şermezar kerdî.

Kerîma Qewalî pare kerd ke dewleta tirke kurdî ça de yê hêrişê ucayî kena û vat: ''Hemkarîya PDKyî ra nêbîyêne dewleta tirke nêeşkena bi sereyê xo nê hêrişan bikera û keyeyê ma de rojnamegeran bikera hedef. Dewleta tirke verê cû zî Başûr û Rojawanê Kurdîstanî de hêrişan de rojnamegerî kerdbî hedef.Ma heta peynî hetê çapemenîya xo de yê û nê hêrişan ra nêtersenê. Dewleta tirke şerê vera gerîlayan de bin kewena û bi hêrsî hêrişê çapemenîya azade kena. Çunke nêwazena çapemenîye raştîyan eşkera bikera.''

Îsmayîl Hilalîyî wird rojnamegerî yad kerdî û vat: ''Seba ke çapemenîya azade raştî û barbarîya dewleta tirke eşkera kena, dewleta tirke zî bêvengkerdişê ci xo rê kerdo armanco verêne. Şerm a ke PDK û dewleta Iraqî rayîr danê nê hêrişan. Dewleta tirke Lozanî ra heta nika kurdan red, înkar û çin kena. Şehadetê embazanê rojnamegeran qerardarîya ma zêdîna. Sey şarê kurdî ganî ma tewirê xo bimojnê. Ganî kurdî vera faşîzmî têkoşînê xo berz bikerê.''