Deynê Şaredarîya Geverî zêdîyeno. Deynê şaredarîye nika 1 mîlyar û 36 mîlyon o. Hemşaredarê Geverî Îrfan Sariyo ke herinda ci de qeyûm amebi tayînkerdene derheqê rewşe de ANFyî rê qisey kerd.

Sariyî ard ziwan ke qeyûm sey polîtîkaya dewlete seba ameyoxê sîyasetê AKPyî ame awankerdene û vat: ''Dewlete wazena na polîtîka normalîze bikera. HDPyî xeylêk xebatê holî kerdî, na babete de xo îsbat kerd. Erdogan û AKPyî seba ke verê HDPyî bigêrê polîtîkaya qeyûmî arde ca. No qeyûmê Geverî yê AKPyî mudaxeleyê xebatanê kulturî keno, kasayanê şaredarîyan veng keno, îhaleyan dano terefgîranê AKPyî û dizdîye keno. Qeyûmê Geverî keno ke qeza veng bikero.''

Sariyî pare kerd ke nê polîtîkayî şaristananê bînan ê Kurdîstanî de zî yenê caardene û vat: ''Şarê Geverî payan ser o, apey gamêke nêeşta. Ma wextêkê kilmî de xebatê girîngî kerdî la mudaxele û polîtîkaya qeyûmî ra projeyê ma nêmcet mendî. Polîtîkaya qeyûmî zerarêkê pîlî dana şarî.''

Sariyî da zanayene ke 31ê adare de deynê şaredarîye 686 mîlyon û her ke şino no deyn zêdîyeno. Sariyî vat: ''Ewro deynê şaredarîye 1 mîlyar û 36 mîlyon TL yo. Eke şarê ma mil bi mil têkoşîn bikero, serê sindoqan de do dersê îqtîdarî reyna bido.''