Şaredarîya Awiskî: Ma do milê xo çirey çewt nêkerê

Şaredarîya Awiskî de cigêrayîş qedîya. Hemşaredara Awiskî Hatîce Taşa ke binê alûqaya leşkeran de qisey kerd, vat ma do milê xo çirey çewt nêkerê.

Wezîfeyê hemşaredaranê bajarekê Awiskî yê qezaya Qûbînî ya Êlihî Hatîce Taş û Osman Karabulutî ame xespkerdene. Herinda înan de Qaymeqamê Qûbînî Sînan Aşçi sey qeyûmî ame cakerdene. Cigêrayîşê banê şaredarîye de xeylêk ewraqî ameyî destsernayene.

Hemşaredarê Hatîce Taş  û endamanê meclîsê şaredarîye zî tede şar semedê protestoyî verê barîqatê polîsan de vindert. Kîtleyî semedê eşkerayîye hemşaredarê Êlihî  Songul Korkmaz û Mehmet Demîr û îdarekarê HDPyî pawitî. Seba ke destûr înan nêdîya  ke bikewê Qûbînî ê peyser agêrayî. Grûba verê Şaredarîya Awiskî eşkerayêk daye. Hemşaredare Hatîce Taş hêrsê xo ard ziwan û vat ma do şarê xo bipawê. Taşe vist vîrî ke ê bi rayanê zêdan vîjnayîşê 31ê adare de ser kewtî û vat la şaredarîye ameye destsernayene û îradeyê şarî ame xespkerdene. Ma do rixmê heme hêrişan milê xo verê hêrişkaran çewt nêkerê.