Hemserekê Kongreya Neteweyî ya Kurdîstanî (KNK) Ahmet Karamusî derheqê serebûtanê peyênan û nîqaşanê yewîya neteweyîye de ANFyî rê qisey kerd.

Ahmet Karamusî da zanayene ke dewleta tirke xîret kena ke modelê Îdareyê Xoserî yê Rojawanî bi hêrişanê xo tasfîye bikera û seba ney HTŞyî rê tesîr kena. Karamusî vat: ''Dewleta tirke nêwazena ke kurdî mîyanê îdareyî de cabigêra, kurdan red û înkar kena. Dewleta tirke seba çinkerdişê kurdan pêro îmkanê xo seferber kerdê. 

Kurdî ganî Rojawan de yew bibê, naye ra ber alternatîfê kurdan çin û yewîye seba kurdan mejbûrî ya. Ganî kurdî Rojawan de pîya têbigêrê, naye ra ber alternatîfê kurdan o bîn çin o. Tena ENKSî îdareyo nikayên qebul nêkerd. Ma 2012î ra nata vanê ke şert û mercê têgêrayîşê kurdan seba yewîye est ê.''

Karamusî bale ante pêvînayîşê Fermandarê Pêroyî yê QSDyî Mazlûm Ebdîyî û Serekê PDKyî Mesûd Barzanîyî ser û vat ke no pêvînayîş zaf girîng o. Karamusî vat: ''Nê pêvînayîşî ra dima Barzanîyî bernameyêkê Şems TVyî de vato ke  dewleta tirke PKKyî kena bahaneya hêrişanê xo û PKKyî ra ver zî hêrişê vera kurdan est bîyê.''

Karamusî îfade kerd ke dewleta tirke hêrişanê îşxal û qirkerdişî rê dewam kena û vat: ''Dewleta tirke xo rê kurdan sey astengîye vînena. Coka hêrişê xo zêdînayî. Nê hêrişî bi armancê qirkerdişî yenê kerdene. Hêrişê vera Awbendê Tişrînî parçeyê ney ê. Hêrişê Rojawan, Başûr û Vakurî parçeyê ney ê.''

Karamusî vist vîrî ke Wezîrê Karanê Teberî yê Tirkîya Iraq zîyaret kerdo û vat: ''Dewleta tirke kena ke dewletanê herême bikera hemparê polîtîkayanê xo. Şarê kurdî û dostê înan hinî bi asanî polîtîka û armancanê dewleta tirke vînenê. Ganî her kes ney bivîno. Wa her kes vera hêrişanê dewleta tirke tewirê xo bimojno û bi qalanê Tirkîya mexapîyo.''