Baroyê Amedî, Şubeyanê Amedî yê OHD û ÎHDyî verê Edlîyeya Amedî de eşkerayîyêke daye û waşt ke wa Avûkat Firat Epozdemîr cade vera bidîyo ke 23yê çeleyî de amebi destbendkerdene û dima tepişîyabi.

Sekreterê Pêroyî yê Baroyê Amedî Erhan Demîrî metno hempar wend û pare kerd ke sûcdarîya 'endamîya rêxistine' ya vera Epozdemîrî goreyê krîteranê huqûqî nîyo, nê sûcdarîyî avûkatîye bêîtîbar kenê.

Demîrî vat: ''Wa mudaxeleyê vera heqê pawitişî biqedê, Epozdemîr cade vera bidîyo û kesê ke nê tehqîqatanê îlegalan kenê cibigêrîyê. Ma venga pêro baro, avûkat û kesanê hîsgeran danê ke vera ney têkoşîn bikerê.''