Nuştoxan Îhsan Colemêrgî, Nezîr Olçek û Îkram Îşler kurdkî û rewşa qiseykerdişê bi kurdkî ANFyî rê ercnayî.

 Nuştox û tarîxnas Îhsan Colemêrgî pare kerd ke şahîdê şaranê bindestan ziwan û kultur ê, serdestî zî xîret kenê ke nînan werte ra wedarnê. Colemêrgîyî vat: ''Dewlete bêîtîfqaîya kurdan rê îstîfadekerd û tedaya kurdkî kerde. Dewlete kena ke şarê ma kurdkî xo vîr a bikero. Verê kurdan de astengîyî ronîyenê ke kurdkî nêmusê. Coka sîyasetmedarî pîya ganî zêdêr wayîrê ziwanê xo vejîyê. Kurdî semedo ke kurdkî çin nêba ganî keyeyanê xo bikerê halînê perwerdeyê kurdkî.''

Nuştox Nezîr Olçekî vat: ''Kulturê ereb, fars û tirkan kurdkî girewte binê estbîyayîşê xo. Roşnvîr, nuştox, hunermendê kurdî, kesê ke wazenê verê ney bigêrê ganî mîyanê her şert û mercî de bixebitê. Hînî domanê kurdî bi tirkî qisey kenê. Ganî ma domananê xo pê estanikanê xo pîl bikerê.Her keyeyêk ganî bibo sey dibistanêka kurdkî. Wa keyeyî bi kurdkî bixebitê û bi kulturê kurdan biciwîyê.''

Nuştox Îkram Îşlerî vat: ''Domanê ma tirkî qisey kenê. Kurdî ganî vera ney wurzê payan ser. Eke çîyêk nêro kerdene meseleyî do giranêr bibê. Ganî ma sey keyeyan wayîrê kultur û ziwanê xo vejîyê. Ganî ma televîzyon seyr kenê kanalanê xo seyr bikerê. Wa verê asîmîlasyonî bêro girewtene. Roşnvîr, nuştox û keyeyê ma ganî giranîye bidê kurdkî ser.''