Halê weşîye yê Nasir Yagizo ke no 67 rojî yo hemverê tecrîdê girankerdeyî yê serê Rayberê Şarê Kurdî Abdullah Ocalanî de grevê vêşanîye yê bêdem û bêagêrayîşî de yo, xirabêr beno.

Çalakîya grevê bêdem û bêagêrayîşî ya Hewlêrî bi koma 34an dewam kena û grevê Yagizî zî roja 67ine de bi qerardarî dewam keno. Çalakî bi tewrbîyayîşê xeylî welatijanê herêmanê cîyayan ê çar perçeyanê Kurdistanî ra amî dewrgirewtene.

Derheqê halê weşîye yê peyênî yê Nasir Yagizî de Temsîlkarîya HDPyî ya Başûrê Kurdistanî ra Muzeyyen Guneşe hayîdarîyî dayî ANFyî.

HER KE ŞINO WEŞÎYA YAGIZÎ XIRAB BENA, NÊEŞKENO AWE ZÎ BIŞIMO

Guneşe ard ziwan ke halê Yagizî ver bi tehlukeyî şino û vat: “Problemê hewnî, mîde, kewtiş û berzbîyayîşê tansîyone estê û ancî verî ra serreyê ci de rîm estbi, her ke şino beno xirabêr. No zî bîyo sebeb ke serreyê ci bimaso. Heman wextî de şimitiş de xeylî zehmetîyan anceno, hendî zerra  ci nêeşkena wedaro û nêeşkeno çîyêk bişimo. Her ke şino nê problemî hîna benê pîl û hendî nêeşkeno awe zî bişimo.”

SERDANÊ PAŞTDAYÎŞÎ

Temsîlkara HDPyî ya Başûrê Kurdistanî Muzeyyen Guneşe ard ziwan ke serdanê seba çalakîye zî dewam kenê û nê vatî: “Mîyanê nê di rojan de Meclîsê HDPyî yê Vakûrê Kurdistanî yê Silêmanîye, Tevgera Azadî, ciwanê Zanîngeha Kerkûkî yê YNKyî û Tevgera Goran ameyî serdana ci. Heman wextî de ciwananê Kerkûkî ard ziwan ke înan do seba paştdayîşî çalakîyêk biviraştêne la seba ke destûr nêdîyayo nêeşkenê. La vat ke do rojanê ameyoxan de bi çalakîyanê cîyayan paştdayîşê xo xurtêr ramojnê. Welatijê ke Vakûrê Kurdistanî ra yê zî her game yenê serdana ci û di komî zî bajarê Hewlêrî ra ameyî serdana Yagizî. Nînan hêz û moralêko hîna zêde da Yagizî.”  

MEXMÛR

Çalakîya grevê vêşanîye ya bêdem û bêagêrayîşî ya Kampa Multecîyan a Şehîd Rûstem Cûdî ya Mexmûrî zî bi koma 14ine roja 42ine de dewam kena. Çalakîya grevê vêşanîye ya bêdem û bêagêrayîşî ya endama Koordînasyona Meclîsê Îştarî yê Mexmûrî Fadîla Toke roja 37ine de dest pêkerde û roja xo ya 6ine de ya.

ŞENGAL

Endamanê Şaredarîya Şarî ya Şengalî grevê vêşanîye yê Şengalî yo ke roja 21ine de yo endamanê Kultur û Hunerî yê Şengalî û Hunermendanê Êzidxanî ra dewr girewt.

Heman wextî de paştdayîşê seba çalakîya grevê vêşanîye zî dewam kenê. Her roje bi desan welatijî û organîzasyonî şinê serdana çalakwanan û paştdayîşê xo anê ziwan.

Endamanê Meclîsê Şengalî yê Teberê Welatî (MŞD) zî şîyî serdana çalakwanan û xoverdayîşê înan silam kerd.