Droneyanê çekdaran ê dewleta tirke ya îşxalkere vizêr qezaya Kelarî ya şaristanê Silêmanî ya Başûrê Kurdîstanî de hêrişê wesayîtêkî kerdbi. Hêriş de 4 kesan dinyaya xo bedilnabî û 1 kes zî bi giranî birîndar bibi.

Îdareyê Xoserî yê Rojawanê Kurdîstanî da zanayene ke hêriş de nê çar kesan ra yew zî Hetkarê Konseya Rayberdişî ya Îdareyê Xoserî Ferhat Şiblî bîyo.

Eşkerayîya ke hetê Konseya Rayberdişî ya Îdareyê Xoserî ra dîyabî de nê çîyî ameyî vatene: ''Hêrişê vera wesayîtê sivîlî de Hetkarê Konseya Rayberdişî ya Îdareyê Xoserî Ferhat Şiblî şehîd bi ke Şiblî seba tedawî û tay pêvînayîşan Silêmanî de bibi. Armancê nê hêrişî no yo ke bi hawayêkê sîstematîkî şarê ma û Îdareyo Xoser bêrê çinkerdene.

Ma venga Hukmatê Başûrê Kurdîstanî û Iraqî danê ke vera dewleta tirke ya ke normanê mîyanneteweyîyan peygoş kena û qirkerdişî kena, bi mesuldarî têbigêrê û vera hêrişanê terorî yê dewleta tirke tewirêkî bigêrê.''