Awbend, ocaxê xîzî û HES ê ke dewleta tirke Çemê Pasûrî ser de viraştê, awa pakî ya 50 dewan herimnena. Awbendê Farqînî yo ke mabênê Licê, Pasûr û Farqînî de virazîyayo qasê 50 dewan mexdûr keno.

HES û ocaxê xîzî yê ke Çemê Pasûrî ser de virazîyayê tesîrê cuya gandaran kenê û awa pakîye pîs kenê. Dewijê Kanîkanî dîyar kenê ke 50 dewê qeraxê Çemê Pasûrî nêeşkenê awa pakîye peyda bikerê. 

Dewijanê Kanîkanî ra Nîzam Ateşî pare kerd ke Pasûr bêwayîr o û bi serran o çareserîya na mesele nêameye dîyene. Ateşî vat ke şantîyeyanê ocaxê xîzî ra awe bena lêşin û awa lêşine zî herikîyena mîyanê Çemê Pasûrî. 

Ateşî vat: ''Awa kanalîzasyonî ya Pasûrî nêna pakîkerdene û herikîyena çemê ma. HESî zî hamnanî awe pêsnenê. Wexto ke awe pêsena masêyî zî mirenê. Ma nêeşkenê baxçeyanê xo awe bidê, awe berê keyeyê xo. Teyna merdimî net bi hezaran heywanî na awe wenê. Dewê Badika, Hevêdan û Kulpîya îhtîyacîya xo pê na awe peyda kenê. La bi serran o serê çemî de merkezêkê pakîkerdişê awe nêame awankerdene. Awbend, HES, ocaxê xîzî û kanalîzasyınî ra bi serran o na mesele dewam kena.''

Dewijan ra Abdullah Kiliçî vat: ''Şima rewşe awe vînen. Pêro heywanî mirenê. Na bêwijdanî ya. Ez 66 serre ya û reya verêne mi awe wina dîya. HES 10 serrî verî virazîyabi. Seba ke pê ceyranî virazê nêverdenê awe biherika. Labelê ma do seba ke awe çin a bimirê. Ma wazenê ke awe nêra birnayene. Ma wazenê ke wa wekîl na babete ser o bixebitê.''