Vera tecrîdê serê Rayberê Şarê Kurdî abdullah Ocalanî û seba çareserîya meseleya kurdan tepişteyê dewaya PKK û PAJKî 27ê teşrîna peyêne ra nata grevê vêşanîye kenê. Seba paştdayîşê grevê vêşanîye xeylêk şaristanan de zî Nobetê Edaletî yenê kerdene.

Muhammed Kaya 2017 de bi îdîaya 'endamîya rêxistine' tepişîyabi. Kaya nika Zîndanê Antalya de hucreyê xo yê yewkesîyî de grevê vêşanîye de yo. Dadîya Muhammed Kayayî Afîfe Kartal zî Amed de  Nobeta Edaletî kena.

Dayîke Afîfe Kartal derheqê babete de ANFyî rê qisey kerd û vat: ''Lajê mi roja roşanî tepişîyabi. Sereştiş de leşkeran ma rê gef wendbi û çeke nabi sereyê mêrdeyê mi. Lajê mi 6 serrî yo bi îfadeyê kesêkî tepişîyeno. Mi telefon de a roje lajê xo de qisey kerd. Mi ci rê vat ke ez zî Nobeta Edaletî kena. Zaf keyfê ci ame. Domanê ma heta ke tecrîd biqedo grevê vêşanîye ra do fek vera nêdê. Ma paştî danê domananê xo. Ez venga pêro keyeyan danê ke wa paştî bidê grevê vêşanîye.

Heta ke tecrîdê vera Rayber Apoyî biqedo ma do grevê vêşanîye bikerê. Ez nêweş a, hîrê reyî anjîyo bîya. Rixmê ney zî ez tîya de ya. Wijdanê mi rehet nîyo. Rewşêka winayêne de ke domanê ma zîndan de grevê vêşanîye kenê ma senî keyeyê xo de i rehetî ronişê? Ma wazenê ke wa zîndanan ra cenazayê domananê ma nêvejîyê. Wa waştişê înan bêrê qebulkerdene.''