Asayîşê PDKyî yê Hewlêrî 23ê teşrîna peyêne de Hasan Kaçaro ke Vakurê Kurdîstanî ra yo, cinî û domanê ci Hewlêrî ra vetbî.

Keyeyê Kaçarî seba ke nê hêrişî protesto bikero Silêmanî de verê Ofîsê Neteweyanê Yewbîyayeyan de 1ê kanûne de xeyme akerdbî. Kaçarî tîya de eşkerayîyêke dabî û pare kerdbî ke asayîşî pê îşkenceyî ê Hewlêrî ra vetê. Kaçarî vatbi: ''Domananê mi Hewlêr de wendêne la nika ê perwerde û heqê xo ra dûrî visîyayî.''

Kaçarî venga Neteweyanê Yewbîyayeyan dabi ke wezîfeyê xo bîyarê ca. La şanê a roje Kaçar ame destbendkerdene. Rojnewsî zî da zanayene ke Mudirîya Polîsan a Silêmanî 2ê kanûne de telefonê înan kerdo û sereraşt kerdo ke Kaçar ameyo destbendkerdene.

Temsîlkaranê HDPyî yê Silêmanî zî îfade kerd ke Kaçar ameyo destbendkerdene. Temsîlkaran pê hesna ke Mudirîya Asayîşî înan rê vat ke semedo ke destûrê îkametî yê Kaçarî çin o û xeyme akerde ameyo destbendkerdene. Wina yeno texmîn kerdêne ke Neteweyanê Yewbîyayeyan gerreyê Kaçarî kerdo.

Kaçar 12 serran zîndananê dewleta tirke de mend. Israranê Rayberê Şarê Kurdî Abdullah Ocalanî ra dima 2014 de Kaçar nêweşîyanê xo ra 12 tepişteyanê sîyasîyan reyde vera dîyabi.