Cayanê cîya-cîyayan ê dinya ra 150 kesan waştbi semedo ke verê îşxalê Tirkîya bigêrê şorê Hewlêr la tayê aktîvîstî ameybî astengkerdene, tayê bînî zî sînorî ra ameybî teberkerdene.

Ewro Hewlêr de Heyetê Haştîye yê bi 70 kesan waşt ke verê ofîsê Neteweyan ê Yewbîyayeyan (NY) ê Hewlêrî de eşkerayîye bidê la PDKyî heyet asteng kerd. Hêzanê PDKyî dormeyê Otêla Blue Mercuryî zî girewt. La heyetî kombîyayîşê çapemenîye kerd û ronayîşê Înîsîyatîfê 'Defend Kurdîstan-Kurdîstanî Bipawe' îlan kerd.

Heyetî eşkerayîya sorankî de da zanayene ke înan derheqê eşkerayîya xo ya NYyî de agahîye dabi Sefîn Dîzayîyî û vat: ''Ma Sefeyîyî rê vat ke ma wazenê şorê cayanê ke yenê bombardumankerdene, tede şer estê. La şewe waştişê ma ame redkerdene. ''

Eşkerayîya îngilîzkî de zî ame parekerdene ke dinya û Kurdîstan de nêzdîyê 150 roşnvîr, hunermend, aktîvîst, rojnameger, sîyadetmedarî hêrişanê Tirkîya teqîb kenê.  Eşkerayîye de ame vatene ke hêrişê dewleta tirke têna gerîlayan nê pêro Kurdîstan hedef kenê û armancê ci îşxal o.

Heyetî vist vîrî ke Tirkîya Rojawan, Şingal û Mexmûrî zî kena hedef û Efrîn, Girê Sipî, Serêkanîyê, Cerablus, Ezaz zî îşxal kerdî. Heyetî vat: ''Selahîyetdarê PDKyî kenê ke îşxal bikerê meşrû. Netîceyê nê şerî seba pêro Kurdîstanî do binê giran. Coka ganî PDK rayîr nêdo ci. Ganî dinya qebul bikera ke Tirkîya vera kurdan qirkerdiş ana ca. Têna têgêrayîşê kurdan vera nê hêrişan vindeno.''

Eşkerayîye de bale ameye antene ser ke Tirkîya warê mîyanneteweyî de zî sey Lîbya û Azerbaycanî xeylêk welatan rê gefan wanena û nê cayan de çeteyan şuxilnena.

Înîsîyatîfê 'Kurdîstanî Bipawe' eşkerayîye de nê waştişî pêşkêş kerdî:

''Seba ke hêrişê Tirkîya yê vera Başûrê Kurdîstanî cade bêrê vindarnayene û pêro hêzê tirkî û leşkerê cîhadîstî yê kîrakerdeyî apey bêrê antene:

-Başûrê Kurdîstanî de îşxalê tirkan, vurnayîşo demografîh, bêduzenîye û pakîya etnîke vindarnê.

-Texrîb û talanê xozaya Kurdîstanî vindarnê.

-Hêzê mîyanneteweyî û herêmîyî hemkarîya xo ya bi Tirkîya biqedînê

-Ma paştî danê tewirê hemparî yê partî, dezgeh, şar û gerîlayanê kurdan ê vera îşxalê tirkan 

-Rojhelatê Mîyanênî û Dengizê Sipî de projeyê îşxalî yê Neo-Osmanîyan ê Erdoganî rê ney

Kombîyayîş de Serekê Partîya Komunîste ya Fransa û Senator Pierre Laurentî qisey kerd û vat: ''Çira înîsîyatîfê ma yê haştîye tîya de bi hawayêkê normalî nêame pêşwazîkerdene ez fam nêkena. Ma seba haştîye, heqanê kurdan, vera bombardumanan û seba vindarnayîşê hemkarîya Ewropa têkoşînê xo rê dewam kenê.''

Wekîlê Cenevre Remî Paganî zî îfade kerd ke ey wekîlêkê/ Swîsre rê derheqê babete de nuşt û rayaumûmîye rê qala pêro serebûtan û hêrişanê Tirkîya do bikero. Paganîyî vat: ''Ma wazenê wa rayaumûmîya Ewropa na mesele ser o têbigêra û îşxalê Tirkîya vindarna.''