Hemsereka Konseya Rayberdişî ya KCKyî Besê Hozat cewab da persanê ANFyî û rojdem ercna. Qiseykerdişê Besê Hozat ra beşêk wina yo: 

''Vera Rayber Apoyî hêrişê pîlî yenê kerdene. Şexsê Rayber Apoyî de yeno waştene ke şar û merdimê xoverdayoxî bêrê teslimgirewtene. Rayber Apo bi serran o ke xo ver dano. Semedo tewr pîl ê faşîzmê vera cinîyan û komelê Tirkîya tecrîdê Îmraliyî yo. Tecrîdê Îmraliyî vera şarê kurdî polîtîkayêka şer û teda yo. 

Şerê 3. yê Dinya pê şerê Kendavê dest pêkerd û pê Komploya Mîyanneteweyîye xorin bi. Nê şerî sîstemê netewe-dewlete ê herême parçe kerdî. Rewşa Iraqî û Sûrîye zî netîceyêka nê şerî ya. Şar hînî sîstemê netewe-dewlete qebul nêkeno. Hêzê hegemonîkî yê modernîteya kapîtalîste zî xîret kenê ke dînamîkanê herême tasfîye bikerê. Paradîgmaya sîstemê konfederalîzmê demokratîk, ekolojîk û pawitoxîya cinîyan a Rayber Apoyî eşkena Şerê 3. yê Dinya çareser bikera, biqedîna û nêverda ke reyna vîrusê sey Korona bivejîyê werte.

Wedaritişê tecrîdê Rayber Apoyî do cinîyan xurtêr bikero, hîşmend bikero. Girîng o ke cinîyî têkoşînê vera tecrîdî pîl bikerê.

Erdogan seba ke komel teslîm bigêro prosesê janî sey firsendêk xebitneno. Seba ke îradeyê hêzanê demokrasîyî û komelî bişiknê, pê bahaneya qijkeke hêrişê kurdan, HDP û muxalîfan kenê. Ganî muxalefet bivejîyo meydanan. Têkoşînê vera faşîzmî ganî kuçe û meydanan de bêro kerdene. 

Îqtîdarî prosesê janî de tedaya vera tepişteyan ê şorişgêran zêdînaye. Tepişteyî zîndanan de terkê mergî bîyî, bi nê hawayî qirkerdişêk yeno kerdene. Tepişteyî moral danê şarî, xo ver danê. Coka îqtîdar tedaya nînan keno. Tepişteyî rûmetê şarê kurdî yê. Heqê înan o ke şarê kurdî ganî wayîrê ci bivejîyo. Şarê ma, rêxistinê komelê sivîlî, hêzê demokrasîyî ganî zêdêr wayîrê zîndanan bivejîyê. 

Pêro herêmanê Kurdîstanî de gerîlayî vera dewleta tirke çalakîyanê pîlan kenê. Dişmenî pê hêrişane hewayî gerîlayan reyde şer kenê. La propaganda kenê ke ê vera gerîlayan netîce gênê. Gerîlayî her tim xo newe kenê, vera şerê teknîk û îstîxbaratî yê dewleta kolonyalîste metodanê xo yê şerî afernenê. Gerîlayî hêzê fedayî yê. Sey vizêr ewro û siba zî vera kolonyalîzmê qirkerî xoverdayîşê gerîlayan do dewam bikero. Çalakîyê HBDH û YPSyî zaf ercîyaye yê. Ez înan zerrî ra fîraz kena. Çalakîyanê înan îqtîdar tersna.

Dewleta tirke xîret kena ke Başûr bi temamî bikero wîlayetêkê Tirkîya. Başûr de 20 baregehê Tirkîya estê. ÎHA û SÎHAyê înan ê ke gerîlayan ser o bombayan varnenê, Başûrî ra wurzenê ra. Xeylêk qereqolanê PDKyî yê nêzdîyê gerîlayan de MÎTî û dezgehê ci estê. Başûrê Kurdîstanî binê îşxalê dewleta tirke de yê. Sewqîyatê leşkerî yê PDKyî yê seba Zînî Wertê planê hêrişî yê TCyî yo. Parçeyêkê planê tasfîyekerdişê PKKyî yo. TC PDKyî ra wazeno ke vera PKK şer bikero. 

Ganî PDK û Îdareyê Herêma Kurdîstanî nêbê parçeyê hêrişanê TCyî. PDK do nêeşkero naye îzahat bikero. Şar zaneno kam welatperwer o kam bêbext o. Şarê ma çar parçeyanê Kurdîstanî de û teberê welatî de vera alozîya Zînî Wertê nêrazîbîyayîşêko pîl mojna.

Şarê ma heman hîsgerî seba Mexmûrî zî mojneno. Ambargoyê Mexmûrî waştişê îqtîdarê AKP-MHPyî yo. Şarê Mexmûrî seba ke sereyê xo nêerd war yeno cezakerdene. Dewlete xîret kena ke şarê ma teslîm bigêra û kampe vila bikera. Şarê Mexmûrî û kurdê rûmetînî na bêrûmetîye webul nêkenê. Ambargoyê Mexmûrî netîceya têkilîya Tirkîya PKKyî ya.

Têkoşînê Azadîye yê Kurdîstanî mîyanê kurdan de hîşmendîyêka pîle ya neteweyîye afernaye. Şarê ma wazeno partîyê sîyasî yê kurdan bêrê têhet û kongreya neteweyîye bîyarê ca. No waştişê şarê ma waştişê ma yo zî. No proses prosesêko winasên o ke ganî kongreya mîyanneteweyîye bêra caardene, yewîye bêra afernayene û destkewteyî bêrê pawitene. Îqtîdaro qirker ê AKP-MHPyî pêro îmkanê dewlete seba qirkerdişê kurdan xebitnena. Oyo ke rêxistinê kurdî ganî bikerê zî no yo ke pê yewîya neteweyîye cewab bidê nê hêrişanê qirkeran. Nê wextî de ke Rojhelatê Mîyanênî de statukoyê neweyî yenê awankerdene, eke kurdî nika yew nêbê key benê yew? Nê wextî de caardişê yewîya neteweyîye do bibo berpirsîyarîyêka tarîxîye.''