Merkezê Îrtîbatî û Çapemenîye yê HPGyî bi eşkerayîyêke nasnameyê di gerîlayanê şehîdan eşkera kerdî.

Eşkerayîye wina ya:

''Fermandaranê ma yê fedayîyan Mizgîne û Rûmetî destpêkê hêrişanê îşxalî yê vera artêşa tirke ra nata warê Kuro Jahroyî de xoverdayîşêko pîl kerd, vera derbî dayî artêşa îşxalkere ro û înan xeta fedayîtî ya Zapî eşkera kerde. Çunke înan pê bawer kerd ke hêrişê dişmenî ancax bi nê hawayî şikîyenê û nê esasî ser o xoverdayîşêk aferna. Embazanê ma Mizgîne û Rûmetî bi îradeyê Apogîrî şer kerd û şehîd bîyî. Înan sey fermandaranê sembolaê Xoverdayîşê Zapî tarîxê xoverdayîşî yê şarê ma de, cayê xo girewt.

Nasnameyê embazanê ma yê şehîda wina yo:

Embaze Mizgîne şaristanê Makuyî yê Rojhelatê Kurdîstanî de dadîya xo ra bîya. Embaze Mizgîne cigêrayîş û persanê xo ra dima gerîlayê azadîye şinasnayî û 2006 de verê xo da koyanê azadan. Aye verî warê Qendîlî de perwerde girewt û cade cuya gerîlatîye musaye. Embaze Mizgîne 2007-2008 de tewra Hêzanê Taybetan bîye û warê leşkerîye de perwerdeyê pisporîye girewt. Serra 2010î de a derbazê Zagrosan bîye û 5 serran Zagrosan de sey fermandarêke têkoşîn kena. 2015 e çalakîyêke de a bena birîndar û dima ke tedawî bena reyna agêrena koyan. 2016 de sey Fermandara YJA-Starî aye verê xo da Botanî û fermandarîya tîmanê hereketînan kerde. 2016 de Besta de a bi aktîfî têgêraye û 16ê tebxa 2017î de çalakîya Verîyê Berojî yê Besta de sey fermandarêka baskan ca girewte û pêro dinya rê çêrîya cinîyan ê kurdan mojnaye. Embaze Mizgîne 2020 de Botanî ra derbazê Herêmanê Pawitişî yê Medya bîye û akademî de perwerde girewt. Dima a reyna derbazê warê Kuro Jahroyî yê Zapî bîye tîya de kedê pîlî ayî. Embaze Mizgîne destpêkê hêrişanê vera Kuro Jahroyî ra nata bi çêrî kerd û şehîd bîye. Ma pê sereberz ê ke fermandarêka ma ya winayêne est bîye.

Embaz Rûmet Kobanê de dadîya xo ra bîyo. Embaz Rûmeto ke binê tesîrê Şorişê Rojawanî û Xoverdayîşê Kobanê bibi, verî Rojawan de mîyanê xebatan de ca girewt dima zî tewrê gerîlayan bi. Embaz Rûmetî bi taybetî giranîye daye perwerdeyanê xo. Embaz Rûmet serra 2020î de derbazê Zapî bi. Embaz Rûmet Zap de pê kesayet û têgêrayîşê xo bi mazharê heskerdiş û hûrmetê embazanê xo. Wexto ke artêşa îşxalkere hêrişê Kuro Jahroyî kerd o zî mîyanê tîmanê verênan ê xoverdayîşî de bi. Embaz Rûmeto ke fermandaranê serkêşan ê xoverdayîşê Zapî ra yew bi, nê xoverdayîşê destanwarî de bi çêrî şer kerd û şehîd bi.

Înan bi hişmendîya mesuldarîya xo ya tarîxîye vera hêrişê dişmenî xoverayîşêko destanwarî kerd û ancî mojna ke kurdê azadî do vera kolonyalîzmî sereyê xo nêarê war. Ma sere de keyeyanê ercîyayeyan ê embazanê xo rê, pêro şarê welatperwerî yê Kurdîstanî rê serweşîye wazenê.''