Merkezê Îrtîbatî û Çapemenîye yê HPGyî nasnameyê 4 şehîdanê Zapî eşkera kerdî. Eşkerayîye wina ya:

''Vera hêrişanê artêşa tirke ya îşxalkere yê serê Zapî xoverdayîşo destanwarî yê gerîlayanê azadîye dewam keno. Nê prosesê şerê çetinî de îşxalkerê ke nêeşkayî biresê hedefanê xo, bîyî teng. No bêguman netîceya rêxistinîya tîmanê hereketînan, ruhê fedayî û cesaretê berzî yê gerîlayan de qewimîya. Embazê ma dişmen key têbigêro dano piro. Embazê ma Bahoz, Kamuran, Zana û Herekol ê ke nê xoverdayîşê destanwarî rê serkêşîye kerde, mîyanê tîmanê hereketînan de derbê giranî dayî dişmenî ro û prosesê şerî de şehîd bîyî.

Nasnameyê embazanê ma yê şehîdan wina yê:

Embaz Bahoz Til Temir de dadîya xo ra bîyo. Kekê embaz Bahozî vera hêrişanê DAÎŞî yê serê Til Temir de şehîd bi. Embaz Bahozî naye ser o bire daye û 2018 de verê xo da koyan û nameyê kekê xo girewt. Embaz Bahozî koyan de perwerdeyê pisporîye girewt. O 2020 de derbazê Zapî bi û tîya de fedakarîyêka pîle mojnaye. Embaz Bahozî xeylêk çalakîyan de ca girewt û bi wayîrê kedêka girînge. Embaz Bahoz 17ê nîsane hêrişan ra nata mîyanê tîmanê hereketînan de ca girewt û 22ê nîsane de şehîd bi.

Embaz Kamuran Gabar Şirmex de dadîya xo ra bîyo. Embaz Kamuran rêçê di xalan û merdimanê xo de şi û tewrê gerîlayan bi. Embaz Kamuranî Zap de dest pê gerîlatîye kerd û tecrubeyê pîlî vistî destî. Embazê ma tîya de serkêşîya çalakîyanê girîngan kerde û bi fermandarêko marîfetin. Embaz Kamuranî wexto ke vera Zapî hêrişî dest pêkerd, cade dest eşt çeka xo û derbê giranî dayî dişmenî ro. Embaz Kamuran 22ê nîsane de şehîd bi. Vîrameyîşê embaz Kamuranî do tim mîyanê têkoşînê ma de biciwîyo.

Embaz Zana Qamişlo de dadîya xo ra bîyo. Embaz Zanayî şorişê Rojawanî ra dima têgêrayîşê ma şinasna û bi qerardarî verê xo da koyanê azadan. Embaz Zanayî dima ke xo warê gerîlatîye de aver berd, derbazê Zapî bi û bi coşî tewrê pratîkan bi. Embaz Zanayî zî roja verêne ya hêrişan de cade têgêra û verê hêrişanê îşxalî yê dişmenî girewt. Embaz Zanayî bi rojan şer kerd, destanêk nuşt û 22ê nîsane de şehîd bi. Ma do sey embazanê ci têkoşînê Zanayî rê dewam bikerê û Kurdîstanê Azadî-Rayberîya Azade awan bikerê.

Embaz Herekolî Girkê Lege de dadîya xo ra bîyo. Embaz Herekolî Şorişê Rojawanî ra dima 2017 de verê xo da koyanê azadan û cade cuya gerîlatîye musa. Embaz Herekol bi perwerdeyan vejîya vernî û 2018 de derbazê Zapî bi. Embaz Herekolî wextê hêrişanê vera Zapî yê 2021î de zî pêro mewzîyan de cagirewt, vera hêrişanê dişmenî tewrê pêro çalakîyan bi. Embaz Herekolo ke nê çalakîyan de tecrubeyê pîlî vistbî destî warê tîmanê hereketînan de bi profesyonel. Embaz Herekolî nê hêrişanê 2022yî de zî mîyanê nê tîman de ca girewt û embazanê verênan ra bi ke Zap de derbe daye dişmenî ro.

Embazê ma Bahoz, Kamuran, Zana û Herekol bîyî çêr û temsîlkarê kurdayetîye. Ma sere de keyeyanê ercîyayeyan ê embazanê xo rê pêro şarê welatperwerî yê Kurdîstanî rê serweşîye wazenê. Ma soz danê ke erkanê şorişî yê ke înan dewrê ma kerdê, bi serfîrazî bîyarê ca.''