Merkezê Îrtîbatî û Çapemenîye yê HPGyî nasnameyê 5 gerîlayanê ke Serhed de şehîd bîyê eşkera kerdî. Eşkerayîye wina ya:

''4ê tebaxa 2021î de qezaya Ebexî ya Wanî de pêkewtişanê vera hêzanê îşxalkeran de embazê ma Nûda, Mîraz û Xwînrêjî heta nefesê xo yê peyênî ruhê Apogîrî ra tawîz nêda, şer kerd û bi çêrî şehîd bîyî.  21ê temmuza 2021î de komêka embazanê ma wexto ke wezîfeyê xo ser de bîyî vera artêşa tirke ya îşxalkere tewrê pêkewtişî bîye. Embazanê ma Xwînrej û Azad vera dişmenî bi çêrî şer kerd û pêkewtişan de şehîd bîyî.

Nasnameyê embazanê ma yê şehîdan wina yê:

Nameyê Qodî: Nûda Sason Name û Peyname: Suheyla Çelîk Cayê Bîyayîşî: Êlih Maye-Pî: Sabrîye – Enver Tarîx û Cayê Şehadetî: 4ê Tebaxa 2021î / Serhed

 

Nameyê Qodî: Mîraz Arî Name û Peyname: Haldun Altay Cayê Bîyayîşî: Erzirom Maye-Pî: Gulnaze – Nîyazî Tarîx û Cayê Şehadetî: 4ê Tebaxa 2021î / Serhed

 

Nameyê Qodî: Xwînrêj Teyî Name û Peyname: Nurullah Azma Cayê Bîyayîşî: Şirnex Maye-Pî: Gulsume – Ramazan Tarîx û Cayê Şehadetî: 4ê Tebaxa 2021î / Serhed

 

Nameyê Qodî: Xwînrêj Şiyar Name û Peyname: Ridvan Ozer Cayê Bîyayîşî: Colemêrg Maye-Pî: Necla – Abdulvahap Tarîx û Cayê Şehadetî: 21ê Temmuza 2021î / Serhed

 

Nameyê Qodî: Azad Guler Name û Peyname: Mumtaz Okyay Cayê Bîyayîşî: Mûş Maye-Pî: Fazîle – Nevzat Tarîx û Cayê Şehadetî: 21ê Temmuza 2021î / Serhed

Embaze Nûda Êlih de dadîya xo ra bîya û wexto ke zanîngeh de wendêne tewra gerîlayan bîye. Embaze Nûda wextêkê kilmî de cuya gerîlatîye musaye û pêro waran de xeylêk mesuldarîyî girewtî xo milî. Bi nê hawayî aye xo aver berd û bîye fermandarêka serkêşe. Embaza Nûda Şingal û Kobanê de vera DAÎŞî şer kerd û birîndar bîye. Rixmê ney zî a heqê pêro zehmetîyan ra ameya. A pê waştişê xo derbazê warê Serhedî bîye û nê eyaletî de milîtanîya xo mojnaye. Aye sey Fermandarêka YJA-Starî warê Serhedî de serkêşîya xeylêk çalakîyan kerde û pêro wezîfeyê xo ardî ca.

Embaz Mîraz Erzirom de dadîya xo ra bîyo û pê hîşmendîya têkoşînî tewrê gerîlayan bi. Embaz Mîraz dima ke 3 serrî Serhed de pratîk kerd derbazê warê Başûrî bi, perwerdeyê îdeolojîk û leşkerî dîyî. Ey herêma Heftanînî vera dişmenî tewr vernî de şer kerd û derbê giranî dayî dişmenî ro. O pê waştişê xo derbazê herêma Serhedî bi û kerd ke Serhed de xeyalê xo yê nêmcetî bîyaro ca.

Embaz Xwînrêj Teyî Şirnex de dadîya xo ra bîyo û vera tecrîdkerdişê Rayberîye tewrê gerîlayan bi. Embaz Xwînrêj Gabarî ra dima derbazê herêma Heftanînî bi  û tîya de pê serfîrazîya xo bi fermandar. O dima waştişê xo ser o Heftanînî ra derbazê Vakurê Kurdîstanî bi û kerd ke şarî reyde bibo yew. Embaz Xwînrêj pê kesayet û fedakarîya xo bi mazharê heskerdişê embazanê xo û mîyanê fermandaranê Serhedî de cayê xo girewt.

Embaz Xwînrêj Şîyar Çelê de dadîya xo ra bîyo û vera qirkerdişê kurdan tewrê têkoşînê koyan bi. Embaz Xwînrêj wextê hêrişanê giranan ê Ertûşî de 2015 de çalakîyan de derbê giranî dayî dişmenî ro. Dima o tewrê perwerdeyan bi, wezîfeyê fermandarîye girewt xo milî û pê waştişê xo derbazê herêma Serhedî ya Vakurê Kurdîstanî bi. Ey wextê wezîfeyê xo de Patnos de kewt dafika dişmenî la rixmê vengdayîşê teslîmîyetî milîtanîya Apogîre mojnaye û mîyanê şehîdan ê rûmetênan de cayê xo girewt.

Embaz Azad Mûş de dadîya xo ra bîyo û o seba cuya ercîyaye tewrê gerîlayan bîyo. Ey tim xîret kerd ke îdeolojî û felsefeya Rayber Apoyî bîyaro ca. Embaz Azad wextê xoverdayîşê xoîdarekerdişî de waştişê xo ser o derbazê Vakurê Kurdîstanî bi û vera dişmenî şer kerd. O wexto ke wezîfeyê xo ser de bi embaz Xwînrêjî reyde heta nefesê xo yê peyênî têkoşîn kerd û şehîd bi.

Ma sere de keyeyanê ercîyayeyan ê embazanê xo rê pêro şarê welatperwerî yê Kurdîstanî rê serweşîye wazenê. Ma soz danê ke do vîrameyîşê embazanê xo yê şehîdan Kurdîstanê azadî de bipawê.''