Fermandarîya Konseya HPGyî bi eşkerayîya nuştekîye da pêhesnayene ke înan kombîyayîşê xo yo serrane kerd.

Ekerayîye de nê ameyî vatene:

''Ma sey Fermandarîya Konseya HPGyî kombîyayîşê xo yo serrane mabênê 18-26ê çeleyê 2021î de kerd. No dewro ke têkoşînê ma merhaleya tarîxîye ra ravêreno de heme waranê ma yê wezîfeyî ra 40 endamê ma tewrê kombîyayîşî bîyî. Kombîyayîş de hetê sîyasî û leşkerî ra serra 2020î ameyî destgirewtene. Rewşa gerîlayan ê war û eyelatan ameye ercnayene. Seba ke serra 2021î bibo serra serkewtişî bi perspektîf û taktîkanê dewrî planê serra 2021î ameyî kerdene.

 Dewleta tirka ke vera têkoşînê ma dewrê xo yê tewr zehîfî ciwîyena seba ke tengayî ra vejîyo vera heme hetanê averşîyayeyan ê komelî polîtîkaya zextî rayra bena. Tengayîya leşkerî zî wazena pê teknîkî hal bikero. Îtîfaqê AKP-MHP-Ergenekonî seba ke pê înan zî netîceya ke wazeno dest nêfîna polîtîkayê şerê taybetî eştî vernî, raştîyan nimeno  û şarî xapîneno. Eke wezîfeyê têkoşînî yê ke nê dewrî de hewce kenê bêrê caardene no îtîfaq cadê rijîyeno. 

Kombîyayîşê ma ke têkoşînê gerîlayan hîra ame destgirewtene de rol û mîsyonê Gerîlayê Azadîye yê Kurdîstanî yê vera raştîya şerê dewrê neweyî ameyî bewlîkerdene. Vera hêrişê hegemonîkî yê Modernîteya Kapîtalîste Gerîlayê Modernîteya Demokratîke xeta şerî ya newîye vete werte. Na çarewe de qerarê muhîmî ameyî girewtene. Problemê ke 2020î de qewimîyayî înan ser ame vindertene û kêmayîyî û problemê taktîkî bi tewirê xurtî ameyî muneqeşekerdene. Bingeyê roşnayîya şehîdanê ma yê dewrî û tecrubeyan de seba serra 2021î biba serra serkewtişî çarçewa Şerê Şarî yê Şorişgêrî de planî ameyî kerdene. Na çarçewe de ça ra yeno wa bêro her qeyde hêrişê ke vera şar û hêzanêma do bêrê kerdene do bi ruhê fedayîyî yê Apoyî cewab bêrê cewabkerdene.

No dewro tarîxî yo ke şarê ma tira verêno hetêkî ra hêrişê vera Kurdîstanî hetê bînî ra tay hetê ke îdîa kenê bi nameyê sîyasetê kurdî têgêrenê konseptê hemparî yê dişmenê şarê ma de ca genê ke no ziraro pîl dano dawaya azadîye yê şarê ma. Kombîyayîş de ame vatene ke hetê heme hêzanê Kurdîstanî ra  tewiro neteweyî muhîm o û şîdetê mabênê kurdan ame redkerdene û ame vatene ke wa problemî pê dîyalogî bêrê çareserkerdene.

Kombîyayîşê ma de mesela bîne ya muhîma ke ma girewt dest tewrbiyayîşê ciwanan ê sefane têkoşînî bî. Her çikas tewrbîyayîş bibo zî reyna zî rixmo ke xeylêk ciwanî wazenê tewrê gerîlayan bibê nêrasayî sefanê ma. Ganî heme ciwanê Kurdîstanî seba ke biresê sefanê gerîlayan zafêr rêxistinkerde têbigêrê. Reyna êyê ke rixmê heme cehdkerdişan neêşekenê biresê koyan wa tewrê yewîyanê otonomanê cayîyan bibê.

Na merheleya muhîme û krîtîke ya têkoşînê ma de ma 9 rojî muneqeşeyê xorî û netîcegirewtoxî kerdî û qerarê tarîxî girewtî ke semedê serra 2021î gamê pîlî yê serkewtişî yê. Mabênê 10-13ê sibate de artêşa tirke hêrişê Garê kerd. Cewabdayîşê Gerîlayanê Azadîye yê Kurdîstanî gama verêne ya kombîyayîşê ma bî ke warê şerî de ameye dîyene. Performanso ke ame ramojnayene nîşanê dewamê serre yo. Kombîyayîş de serkewtiş sey binfînayîşê Komployê Mîyanneteweyî û azadkerdişê Rayber Apoyî yê fîzîkî ame namekerdene û qerar ame girewtene ke nê esasan ser o do têkoşîn bêro kerdene.

Na çarçewe de ma sey hêzê HPG û YJA Starî xeta serkewtişî ya Rayber Apoyî û bi ruhê qehremanîye yê fermandarê ma Kasim Engîn, Egîd Cîvyan, Yilmaz Dersim, Zîne Cizre, Dîlşer Herekol, Egîd Garzan, Amara Ronahî, Leyla Agirî, Bargiran Erkendî  Aryana Baran ê ke par tewrê kerwanê şehîdan bîyî semedê azadîya şar û Rayberîye ya ma do fedayîkî rayra şirê û ser bikewê. Nê dewrê têkoşînê tarîxî de ma heme hemra û hêzanê têkoşran rê serkewtiş wazenê.''