Merkezê Îrtîbatî û Çapemenîye yê HPGyî nasnameyê 4 gerîlayanê ke Heftanîn de şehîd bîyî eşkera kerdî. Eşkerayîye wina ya:

''20ê tebaxa 2021î de nêzdîyê dewa Girê Gohî yê Heftanînî de bombardumanê artêşa tirke ya îşxalkere de embazê ma Dîcle, Amargî, Şahîn û Agît şehîd bîyî. Nê çar embazanê ma rêçê fermandaranê efsanewîyan ê Heftanînî Esmere, Zerya û Bargiranan de têkoşîn kerd û semedo ke dişmenî Heftanînî ra bierzê kedêka pîle daye. Ma nê çar embazanê xo bi minet û rêzî yad kenê.

Nasnameyê embazanê ma yê şehîdan wina yê:

Nameyê Qodî: Dîcle Firat Name û Peyname: Mehtape Ozdemîr Cayê Bîyayîşî: Riha Maye-Pî: Ayhane – Ethem Tarîx û Cayê Şehadetî: 20ê Tebaxa 2021î / Heftanîn

Nameyê Qodî: Amargî Cudî Name û Peyname: Nesrîne Îbrahîm Cayê Bîyayîşî: Amûdê Maye-Pî: Xulute – Îbrahîm Tarîx û Cayê Şehadetî: 20ê Tebaxa 2021î / Heftanîn

Nameyê Qodî: Şahîn Amed Name û Peyname: Abdulvasif Mavînehîr Cayê Bîyayîşî: Amed Maye-Pî: Yuksele – Ferman Tarîx û Cayê Şehadetî: 20ê Tebaxa 2021î / Heftanîn

Nameyê Qodî: Agît Berxwedan Name û Peyname: Raîf Barçin Cayê Bîyayîşî: Şirnex Maye-Pî: Halîme – Îzzettîn Tarîx û Cayê Şehadetî: 20ê Tebaxa 2021î / Heftanîn

Embaze Dîcle Riha de dadîya xo ra bîya. A polîtîkayanê qirkerdişan ê 2015î ra nata bêveng nêmende û tewra gerîlayan bîye.  Embaze Dîcle tim xîret kerd ke xo aver bera û Gerîlatîya Modernîteya Demokratîke bîyara ca. Embaze Dîcle mîyanê Hêzanê Taybetan de ca girewt û 2019 de şerê Heftanînî de pê çalakîyanê serkewteyan keda xo îsbat kerde. Embaze Dîcle 2021 de Heftanîn de xeylêk çalakîyan rê rayberîye kerde û derbê giranî dayî dişmenî ro. A wexto ke wezîfeyê xo ser de biba bombardumanê artêşa îşxalkere de şehîd bîye.

Embaze Amargî şaristanê Amûdê yê Rojawanî de dadîya xo ra bîya. Şorişê Rojawanî ra dima embaze Amargî tewra gerîlayan bîye. Embaze Amargî tim xo perwerde kerd û bîye gerîlayêka marîfetîne ya YJA-Starî. Embaze Amargî 2019 de tewra herêma Heftanînî bîye û xeylêk netîceya girîngî vistî destî. Reyna aye 2020 de çarçewa Hemleya Şorişgêre ya Cengê Heftanînî de ca girewt û rayberîya çalakîyanê serkewteyan kerde. Embaze Amargî pê kesayetê xo û cuya xo bîye mazhara heskerdişê embazanê xo û pêro wezîfeyê xo ardî ca.

Embaz Şahîn Amed de dadîya xo ra bîyo. Embaz Şahîn ciwanîya xo de vera tedaya dewlete tewrê gerîlayan bi. Embaz Şahînî derheqê şuxilîyayîşê çekan de xo hol perwerde kerd, çita musayo embazanê xo reyde pare kerd. Ey wextê şerê Şingalî yê vera DAÎŞî de têkoşîn kerd. Dima ke Şingal de wezîfeyê xo bi serkewtişî qedînayî derbazê Heftanînî bi. Embaz Şahînî Heftanîn de zî pêro wezîfe  û mesuldarîyê xo bêkêmasî ardî ca, tim tewr vernî de ca girewt. Embaz Şahîn pê embazîya xo tim hûrmet dî û şehadetê ci bi moral û hêzê embazanê ey.

Embaz Agît Şirnex de dadîya xo ra bîyo. Embaz Agîtî verî xebatanê ciwanan de ca girewt, 2015 de zî tewrê gerîlayan bi. Ey xo rê kerd hedef ke rêçê Fermandar Egîdî de şoro. Embaz Agîtî Besta ra heta Herekolî xeylêk cayan de têkoşîn kerd. Embaz Şahîn rixmo ke birîndar bi têkoşîn nêterikna. 2019 de o derbazê Heftanînî bi, tecrubeyê xo yê gerîlatîye mojnayî û bi nê hawayî kerd ke enerjîyêka pîle vejîya meydan. Embaz Şahîn pê kesayetê xo yê fedakar û fedayî şinasîya, bi mazharê heskerdiş û hûrmetê embazanê xo.

Ma sere de keyeyanê ercîyayeyan ê embazanê xo rê pêro şarê welatperwerî yê Kurdîstanî rê serweşîye wazenê. Ma reyna soz danê ke têkoşînê azadîye yê şarê xo pê serfîrazî tacîdar bikerê.''