Merkezê Îrtîbatî û Çapemenîye yê HPGyî nasnameyê hîrê gerîlayan ke şehîd bîyî, eşkera kerdî û nê pare kerdî:

“Fermandarê ma hemra Sînan Dijwar pîya bi hemrayanê ma Mazlûm Koçer û Ararat Tolhildanî  10ê adara 2023yî de gama ke Başûrê Kurdîstanî de wezîfeyê xo ser bî, netîceya hêrişê dişmenî de tewrê kerwanê şehîdan bîyî. Mîlîtano sadiq yê Partîya ma PKKyî, hemra Sînano ke 30 serrî xo dayî têkoşînê azadîye û wezîfeyê sey fermandarîya eyaletî girewtî xo ser pîya bi wird hemrayanê xo şehîd bi ke no semedê têkoşînê ma vînîbîyayîşo gird o. Hemrayê Ma Sînan, Mazlûm û Ararat înanê ke emrê xo semedê azadîya şarê xo da, sey meşaleyanê azadîye do tim verê ma roşn bikerê. Ma reyna soz danê ke ma do qesasê şehîdan bîgêrê û têkoşînê înan biresnê serekwtişî. Na çarçewe de ma sere de keyeyanê erjîyayeyan ê hemrayanê xo heme şarê Kurdîstanî rê serweşîye wazenê.

Nasnameyê hemrayanê ma yê şehîdan wina yê:

Hemrayê ma Sînan Dijwar keyeyêkê welatperwerî yê Geverî de yeno dinya. Keyeyê ci eşîrê Doskî ra yo. Hemrayê ma Sînan 1993 de tewrê sefanê PKKyî beno û seba ke bibo şervanêko serkewte û fermandêrêko muzafer zaf kede dano. Verî nameyê Sînan Geverî geno, bado ke dezayê ci Dijwar ( Îlyas Ogmen) Elbakê Wanî de 1994 de şehîd beno, nameyê ey geno û beno Sînan Dijwar. Hemra Sînan Dijwar 1993yî ra heta 1998î bêmabên Zagrosan de gerîlatîye keno. 1996 de  çalakîya vera qereqolê Ertûşî de ca geno û lingê xo ra birîndar beno. 1999 de bado ke raya diyînî mektebê kadroyî de perwerde vîneno, ravîyereno herêmanê Xakurkê û Xinêre. Heta 2006 Xakurkê ra heta Qendîlî, Garê ra heta Zapî her cayanê Herêmanê Pawitişî yê Medya de berpirsîyarîye geno xo ser, fermandarîye keno. Bado ke xeylêk tecrube keno pêser verê xo dano Vakurê Kurdîstanî. 2007 de şino Botan û ûca ra ravîyereno Mêrdîn. Mêrdîn de qezayêk de destê xo yê raştî ra di engiştanê xo vînî keno. Semedê tedawî agêreno Herêmanê Pawitişî yê Medya û badê tedawî reyna agêreno wezîfeyê xo ser. 2008 de Akemendîya Hakî Karerî de perwerde vîneno û reyna verê xo dano Xakurkê û Zagrosan. Badê pratîkê di serran 2010 de ravîyereno waranê Heftanîn û Metîna û çar serî tîya berpirsîyarîye geno xo ser. 2014î ra heta 2023yî waranê cîya cîyayan ê Başûrê Kurdîstanî de falîyet rayra beno. Nê prosesî de tewrê perwerdeyê Ocagê PKKyî yê Sakîne Cansiz beno.

Hemrayê ma Mazlûm Sêrt de yeno dinya û sey endamêkê eşîrê Alikîyî bi kulturê welatperwerîye beno pîl. Hema domanîya xo ra Têgêrayîşê Azadîye yê Kurdîstanî nas keno. Hemrayê ma Mazlûm 2013 de Garzan de tewrê sefanê gerîlayan beno. Wextêk Garzan de maneno û perwerdeyê xo yê verênî tîya geno. Dima ra ravîyereno Herêmanê Pawitişî yê Medya û Zap de perwerdeyê şervananê neweyan vîneno. Badê perwerdeyî herêma Zapî de tewrê xebatan beno. Heta 2017î Zap de tewrê xeylêk çalakîyan beno. 2018 de verê xo dano Qendîlî û tîya mîyanê xebatanê cîya cîyayan de ca geno.

Hemrayê ma Ararat bajarê Serêkanîyê yê Rojawanê Kurdîstanî de yeno dinya û keyeyêkê welatperwerî de beno pîl. Hemrayê Ararat 2019 de tewerê sefanê PKKyî beno û xeyalê xo yê domanîye ano ca. Herêmanê Pawitişî yê Medya de perwerdeyê bigeyênî geno û bi coşê girdî tewrê têkoşînî beno. Seba ke bibo gerîlayo sekewte her hetî ra xo aver beno. Akademîyanê leşkerî de perwerdeyê pîsporîye vîneno û beno gerîlayo profesyonel ê Gerîlatîya Modernîteya Demokratîke.”