Merkezê Îrtîbatî û Çapemenîye yê HPGyî nasnameyê 3 gerîlayanê ke Botan de şehîd bîyî eşkera kerdî. Eşkerayîye wina ya:

''Menganê nîsane û gulane de operasyonanê artêşa tirke ya îşxalkere de Kela Memê de mabênê hêzanê ma û îşxalkeran de pêkewtişî qewimîyayî. Netîceya mudaxeleyê bitesîrî yê hêzanê ma de xeylêk îşxalkerî ameyî cezakerdene û birîndar bîyî. Artêşa tirke ya îşxalkera ke pê xoverdayîşê embazanê ma nêeşkîyaye warê operasyonî ra gamêke xo apey ant. Dima warê embazanê ma dîyayî bombayan ver. Netîceya nê bombardumanan de embazê ma Şervan, Dilxwaz û ronî şehîd bîyî.

Nasnameyê embazanê ma yê şehîdan wina yê:

Nameyê Qodî: Şervan Egîd Name û Peyname: Hatîp Kiliç Cayê Bîyayîşî: Mûş Maye-Pî: Emîne – Resul Tarîx û Cayê Şehadetî: 19ê Gulana 2021î / Botan

Nameyê Qodî: Dilxwaz Bingol Name û Peyname: Huşmend Adak Cayê Bîyayîşî: Hewreman Maye-Pî: Mîna – Abît Tarîx û Cayê Şehadetî: 19ê Gulana 2021î / Botan

Nameyê Qodî: Ronî Çiyager Name û Peyname: Adnan Dogan Cayê Bîyayîşî: Mêrdîn Maye-Pî: Zumrute – Abdurrahman Tarîx û Cayê Şehadetî: 19ê Gulana 2021î / Botan

Embaz Şervan qezaya Gimgimî ya Mûşî de dadîya xo ra bîyo. Embaz Şervan zanîngeh de tewrê xebata ciwanan bi. O wextê hêrişanê DAÎŞî de tewrê Şorişê Rojawanî bi. Dima ke ey vera DAÎŞî şer kerd, wezîfeyê xo ardî ca verê xo da koyanê Kurdîstanî û bi gerîla. Embaz Şervanî verî Botan de gerîlatîye kerde û tim xîret kerd ke bibo layîqê mîrasê şehîdan. Ey sey mlîtanêkê Apogîrî tim vernî de ca girewt û bi hawayêkê aktîfî têgêra. Embaz Şervan do tim sey rayberêkê têkoşînî bêro vîrardene.

Embaz Dilxwaz herêma Hewremanî ya Rojhelatê Kurdîstanî de dadîya xo ra bîyo. Dima ke embazê ci tewrê PKKyî bîyî o zî tewrê gerîlayan bi. Embaz Dilxwaz cade cuya gerîlatîye musa, embazanê xo ra kurmanckî musa û waştişê xo ser o derbazê Vakurê Kurdîstanî bi. Embaz Dilxwazî gerîlatîya Vakurî de raştîya dişmenî hîna hol fam kerde. Bi nê hawayî vera dişmenî kîn û nefretê ey bîyî zêdêr û ey nê hîsê xo pê performansanê xo yê serkewteyan bi hawayêkê zelalî îsbat kerdî.

Embaz Ronî Mêrdîn de dadîya xo ra bîyo. Embaz Ronî xoverdayîşê xoîdarekerdişî ra dima rîyê dewlete dî û tewrê gerîlayan bi. Embaz Ronîyî hema hema pêro herêmanê Botanî de gerîlatîye kerde û zaf giranîye daye perwerdeyanê xo, têna teorî ser nê pratîk ser o zî vindert. Embaz Ronî tewrê xeylêk çalakîyan bi, serê rayîrê fermandaranê efsaneyan Adil, Gelhat û Gulbaharan de şi û ey tim pratîkê nê fermandaran Botan de teqîb kerdî.

Sere de keyeyanê ercîyayeyan ê embazanê ma Şervan, Dilxwaz û Ronîyî ma pêro şarê welatperwerî yê Kurdîstanî rê serweşîye wazenê.''