HPGyî da zanayene ke gerîla Mîraz Serhed par Herêmanê Pawitişî yê Medya de şehîd bîyo û vat: ''Embazê ma Mîrazo ke milîtanêko marîfetîn û şorişgêrêko serkêş bi, rayraşîyayîşê ci yo qerardar do embazanê ci rê bibo nimûne.''
Merkezê Îrtîbatî û Çapemenîye yê HPGyî bi eşkerayîyêke nasnameyê şehîdêkî pare kerd.
Eşkerayîye wina ya:
''Ewladê şarê Serhedî yo qehreman, milîtanê têkoşînê azadîye û şorişgêro profesyonel embazê ma Mîraz Serhed teşrîna verêne ya 2022yî de hêrişê dişmenî de şehîd bi.
Embazê ma Mîrazî 13 serran bi hawayêkê bêmabênî gerîlatîye kerde. Ey xebatanê ciwanan ra heta karê milîsîye, koyan ra heta metropolan her ca de karî kerdî. Rixmo ke o birîndar bibi zî tim wayîrê erk û mesuldarîyanê xo vejîya. Embazê ma Mîrazo ke milîtanêko marîfetîn û şorişgêrêko serkêş bi, rayraşîyayîşê ci yo qerardar do embazanê ci rê bibo nimûne.
Ma sere de keyeyê ci yê ercîyayeyî rê pêro şarê Kurdîstanî û Serhedî yê welatperwerî rê serweşîye wazenê.
Nasnameyê embaz Mîraz Serhedî wina yo:
|
|
Nameyê Qodî: Mîraz Serhed Name û Peyname: Celal Kaya Cayê Bîyayîşî: Agirî Maye-Pî: Kudrete-Salîh Tarîx û Cayê Şehadetî: Teşrîna Verêne ya 2022yî / Herêmê Pawitişî yê Medya |
Keyeyê embazê ma Mîrazî Serewedaritişê Şêx Seîdî ra dima hetê dewlete ra surgunê Afyonî yeno kerdene. La keyeyê ey fîrar keno û tewrê Serewedaritişê Agirî beno. Keye narey zî surgunê Tekîrdagî beno la çar serran ra dima agêreno Patnosê Agirî. Embaz Mîraz mîyanê nê keyeyî de Agirî de dadîya xo ra beno. Lajê xala embaz Mîrazî Dîlager (Mecît Çelîk) tewrê gerîlayan beno û 1994 de Tendûrek de şehîd beno. Nê şehadetî ra dima embaz Mîraz tewrê xebatanê ciwanan beno. Embaz Mîraz Zanîngehê Tekîrdagî de zî xebatanê şorişgêrîye rê dewam keno. O 2003 de zanîngeh terikneno û dima seba gerîlayan xebatanê milîsîye keno.
Embaz Mîraz 2011 de zî tewrê gerîlayan beno. Perwerdeyî ra dima o derbazê metropolan beno û hîrê serran milîsîye keno. Embazê ma Mîraz 2014 de vera hêrişanê DAÎŞî Rojawan de şer keno. Serkewtişê Rojawanî ra dima o 2019 de verê xo dano Herêmanê Pawitişî yê Medya. Embazê ma Mîraz heman serre bi giranî birîndar beno la têkoşînî rê dewam keno.
Dima ke xalzayê ci Rênas Serhed (Îsrafîl Dursun) 2018 de û Fermandare û kênaya xalê ci Guvene Doza (Cansele Dursun) 2022 de şehîd benê vera dişmenî hêrsê embaz Mîrazî zêdîyeno. Embaz Mîraz seba ke bibo layîqê şehîdan hîna zaf têkoşîn keno. Embazê Mîraz tim pêro erk û mesuldarîyanê xo bêkêmasî ano ca û beno mazharê heskerdiş û hûrmetê embazanê xo. Embaz Mîraz hêrişê dişmenî de teşrîna verêne ya 2022yî de şehîd beno.''
