Merkezê Îrtîbatî û Çapemenîye yê HPGyî pê eşkerayîyêke şehîdê Gabarî yad kerdî. Eşkerayîye wina ya:

''3ê çeleyê 2021î de warê Gabarî de vera operasyonê prosesê zimistanî de binê fermandarîya embaze Hîlale Goran de embazanê ma Dorşîne Hebeş, Yildize Yilmaz, Eyleme Zêvkan û Têkoşîn Agît xoverdayîşêko pîl mojna. Nê hêrişan de 5 embazê ma zî pê nasnameyê cinîya azade ya kurde dima ke vera dişmenî xo ver da şehîd bîyî. Nasnameyê embazanê ma wina yê:

Embaze Hîlale aslê xo de Rojhelatê Kurdîstanî ra ya la qezaya Geverî ya Colemêrgî de ameya dinya. Kekê embaze Hîlale Şehîd Goran destpêkê 90an de tewrê gerîlayan bibi û ney zî zaf tesîrê aye kerd. Şehadetê embaz Goranî û esîrkerdişê Rayberîye ra dima 1999 de embaze Hîlale tewra gerîlayan bîye. Embaze Hîlale wextêkê kilmî de bîye fermandara gerîlayan û rayberîya hêzanê YJA-Starî kerde. Embaze Hîlale waştişê xo ser şîye herêma Botanî û uca de rêçê Agît, Azîme, Adil û Gulbaharan ser o şîye. Embaze Hîlale seba ke şerê şorişgêrî yê şarî aver bero zaf xîret kerd û kede daye.

Embaze Dorşîne şaristanê Xoyî yê Rojhelatê Kurdîstanî de dadîya xo ra bîye û serra 2007î de tewra gerîlayan bîye. Embaze Dorşîne seba ke dewleta tirke ra qesasê qirkerdişê wextê xoverdayîşê xoîdarekerdişî bigêra waştişê xo ser o derbazê Vakurî bîye û xoverdayîşê Silopî de ca girewt. Embaze Dorşîne dima bîye fermandarêka marîfetêne ya YJA-Starî. Embaze Dorşîne Cûdî ra heta Besta, Herekolî ra heta Gabarî xeylêk waran de têkoşîn kerd û tim embazanê xo rê bîye mîsal.

Embaze Yildize Şirnex de dadîya xo ra bîye û netîceya cigêrayîşanê xo de 2013 de tewra gerîlayan bîye. Embaze Yildize tim xîret kerd ke sey şerwanêka cinîye xo aver bera û nê esasî ser o zî xo pratîze kerd. Embaze Yildize Botan de sey cinîya azade şer kerd, têkoşînê cinîyan aver berd û bi nê hawayî bîye şerwanêka mîsale ya têkoşînê azadîya cinîyan.

Embaze Eyleme Gever de dadîya xo ra bîye û 2013 de tewra gerîlayan bîye. Embaze Eyleme wextêkê kilmî de bîye mazhara heskerdişê embazanê xo. Embaze Eyleme pê waştişê xo şîye warê Botanî û pê enerjîya îdeolojîya Apogîre derbê giranî dayî dişmenî ro. Embaze Eyleme nê warî de bi hawayêkê aktîfî tewra xeylêk çalakîyan bîye.

Embaze Têkoşîne Şirnex de dadîya xo ra bîye û seba ke qesasê birayê xo yê şehîdî û pêro şehîdan bigêra tewra gerîlayanê azadîye bîye. Embaze Têkoşîne waştişê xo ser o derbazê herêma Botanî bîye û Gabar de xeylêk çalakîyan de tewr vernî de ca girewt. Embaze Têkoşîne pê tewir û kesayetê xo tim do embazanê xo rê biba mîsal.

Sere de keyeyanê ercîyayeyan ê embazanê ma rê ma pêro şarê welatperwerî yê Kurdîstanî rê serweşîye wazenê. Ma sozê xo dibare kenê ke alaya azadîye ya emanetê embazanê xo pê hîşmendî û mesuldarîya layîqbîyayîşê înan tim do berz bikerê.''