Goreyê anketê Merkezê Cigêrayîşê Saha yê Sosyo Polîîtkî esnafê Amedî yo ke tengayîya pîle anceno paketê paştîdayîşî yê hukmatî  ke vera janê Korona eşkera kerdîbî ra hetkarî nêgirewte.

Ankete de ame vatene ke esnafê Amedî yo ke tewr zaf dayîşê kîra ra tengayî anceno têkoşînê vera Korona serkewte nêvîneno. Anketo ke mabênê 13-16ê nîsane de ame kerdene 300 esnafî tewrê ci bîyî û pêvînayîşî rî bi rî ameyî kerdene.

Esnafan ra se ra 82.7î vat ê kîra de yê û înan ra se ra 48î vat kîrayê înan kewtî erey. Tewrbîyayoxan ra nizdê se ra se vat krîzo ekonomîk esto. Zafê esnafan vato ê aşma adare ra nata dikananê xo anêkene zafê înan zî vat ê ge-ge akenê. Tayînan zî vat ê tim akerdeyê.  

Se ra 97.6 ê esnafan vat  înan kîra, fatura, sîgorta, kredî, deyn û dayîşê maaşi tengayî ante. Persê şima nê prosesî de paştdayîşê dewlete ra feyde kerd? rê tewrbîyayoxan ra se ra 95.7î cewabê ney da. Se ra 90.7 ê esnafan zî paştdayîşê dewlete qîymkerde nêdî. Reyna se ra 71. 7î yê tewrbîyayoxanê anketî  polîtîkaya hukmatî ya têkoşînê vera janî zî serkewte nêdîye.