Hunermend Hesen Şerîfo ke dewa Kestê ya herêma Metîna ra yo, xoverdayîşê Kêste ser o deyîra bi nameyê 'Zinarê Serbilind' vete.

Şerîfî derheqê hêrişanê îşxalî yê dewleta tirke yê vera Zap, Metîna û Avaşînî ser o qisey kerd û pare kerd ke her parçeyê Kurdîstanî hedefê dewleta tirke de yo.

Şerîfî vat: ''Kurdî ganî vera nê hêrişan bibê yew. Ewro kurdî pêro dinya de şinasîyenê. Pêşmerge, şerwan û gerîlayan pîya Rojhelatê Mîyanênî de merdimîye pawite coka ganî partîyê kurdan zî hûrmet bimojnê yewbînan. Dewa mi serranê 1976-77î de hetê dîktator Saddam Huseyînî ra ameye vengkerdene û vêşnayene. Nê rojan reyna dewa mi dîyaye bombayan ver. O çax Enfal, Behdînan,, Germîyan, Qelediz, Barzan, Dêrsim, Zîlan û Efrîn ameyî mi vîrî. Mi waşt ez hêrsê xo pê deyîra xo bimojna. Kam beno wa bibo êyê ke erdê ma danê bombayan ver îşxalker ê.''

Şerîfî îfade kerd ke o do tim pê hunerê xo vera îşxalkeran vejîyo û vat: ''Ez têna yewî û wayûbiratîya kurdan wazena. Fikrê înan ê sîyasî se benê wa bibê kurdî ganî vera îşxalkeran bibê yew. Ez sey yew hunermend û pêşmergeyêkê verênî venga pêro lîderanê partîyan ê sîyasîyan ê kurdan dana ke wa yewîya kurdan awan bikerê. Dewleta tirke tim her ca de hêrişê destkewteyanê kurdan kena. Coka ma ganî serê xeta neteweyîye de têbigêrê. Ez ciwananê ganfîdayan ê Kurdîstanî selam kena. Ciwanê kurdî pê xoverdayîşê xo destanan nusenê.''