10ê sibata 2021î de artêşa tiirke ya îşxalkere hêrişê Garê kerdbi û 14ê sibate de zî netîceya xoverdayîşê gerîlayan de xo apey ant. Parlamenterê Partîya Çepe Andrej Hunkoyî ANFyî rê qisey kerd û da zanayene ke dima ke Almanya destûr da dewleta tirke hêrişê Garê kerd.

Hunkoyî vat: ''E vana qey Tirkîya planê operasyonî pêşkêşê Almanya kerd û semedo ke Almanya ver nêvejîyaye Tirkîya planê xo ard ca.''

Hunkoyî vist vîrî ke Wezîrê Pawitişê Tirkîya Hulusî Akarî hêrişî ra ver Berlin de hemmeslega xo Annegret Kramp-Karrenbauer zîyaret kerde û vat: ''Zîyaretî ra dima wird terefan zî eşkera kerd ke ê pê pêvînayîşî kêfweş ê. Verî zî Maas û Çavuşogluyî pêvînayîşêk kerdbi. Dima ame vatene ke Tirkîya seba çareserîya meseleyanê xo gamanê girîngan do bierza. Tirkîya seba ke Almanya hêriş tesdîq bikera wina kerd. Almanya û Yewîya Ewropa (YE) vera hêrişan bêveng ê. Bêvengîya înan îsbat kena ke xebera înan pê hêrişan estbî.''

Hunkoyî pê vernîyazêk Meclîsê Federalî ra persabi ke zîyaretê Berlinî yê Akarî de babete çi bibî. Hukmatî zî cewab de vat ke zîyaret de meseleya Sûrîye û Iraqî ameye nîqaşkerdene. Hunkoyî vat: ''Mi Merkele ra waşt cewabêkê hîrayî bida nê persî. Ganî YE û Almanya hêrişanê vera Garê şermezar bikerê. Almanya ganî hînî çekan nêroşa Tirkîya.''