Rojnamegerê Ozgur Gundemî Huseyîn Denîz 9ê tebaxa 1992î de qezaya Serêkanîyê ya Riha de amebi qetilkerdene. Rojnameger Huseyîn Denîz serrgêra 29. ya qetilkerdişê ci de serê gorê ci de ame yadkerdene. Waya Denîzî Newroze Denîze, lajê ci Şervan, Komeleya Rojnamegeranê Dîcle Firatî, Platformê Rojnamegeran ê Cinîyan ê Mezopotamya, Rojnameger Hakki Boltan, Komeleya Nuştoxanê Mezopotamya, rêxistinê HDPyî yê Riha û Serêkanîyê û xeylêk kesî tewrê merasîmî bîyî.

Hemsereka HDPyî ya Riha Zîya Çalişkanî pare kerd ke Huseyîn Denîz û têkoşînê ci do nêro vîrakerdene. Komeleya Dîcle Firatî ser o zî Zeynel Bulutî qisey kerd û îfade kerd ke Denîz embaz û şagîrtê Musa Anterî bi û vat: ''O serranê 90an de bi vengê şarî. Têkoşînê ci bi azadîye do berz bibo.''

Wekîka HDPyî ya Riha Ayşe Surucu zî pêro rojnamegerê ke ameybî qetilkerdene yad kerdî û vat: ''Ma zanenê kiştoxî kam ê. Ê se kenê wa bikerê rojnamegerî tim raştîyan do eşkera bikerê. ma do alaya înan a têkoşînî berz bikerê.''

Waya Denîzî Newroze Denîz beşdaranê merasimî rê sipas kerd. Yusuf Serhat Bucako ke o çax mudirê ozgur Gundemî bi pê vîdeokonferansî tewrê merasîmî bi.

Vîrameyîş qiseykerdişan ra dima qedîya.