Endamê Komîteya Rayberdişî ya PKKyî Duran Kalkanî Medya Haber TV de rojdem ercna. Qiseykerdişê Kalkanî ra tay noqtayê girîngî wina yê:

''Hîrê serrî yo Rayber Apoyî ra xeberêke çin a. Seba ke vengê ey bieşnawîyo muracatî dewam kenê ke nê zaf girîng ê. Her çi bi têkoşînî mumkîn o.10ê teşrîna verêne de Hemleya Azadîye dîyabî destpêkerdene û serrgêra Komployê 15ê Sibate ra dima zî safhaya hemle ya diyîne dîyaye destpêkerdene. Şarê ma bi xurtî wayîrê na hemle vejîya. La nika Newroze de ganî na hemle biresa leweyî. Hînî no tecrîdê Îmraliyî nêno qebulkerdene. Rayber Apo Îmrali de xoverdayîşêkê pîlî keno û serkêşîya dinya keno. Ma pê bawer ê ke fikr û felsefeya Rayber Apoyî do hîna global bibê û ney reyde têkoşînê seba azadîya ey zî do bibo global.

Newroze dîyaye ke ma na Newroze sey Newroza Rayberîye îlan kerde. Ma vînenê ke çar parçeyanê Kurdîstanî û teberê welatî de şarê ma meydananê Newroze keno de. Na Newroze hîna bi coşî yena fîrazkerdene. Mîyanê pêro Newrozan de aya tewr pîle û qetîye Newroza emserîne. Çunke na Newroze de waştişê azadîya Rayberîye qirîyeno. Êyê ke meydanan de azadîya Rayber Apoyî wazenê qetî do ser bikewê. Hînî çew nêeşkeno verê nê rayraşîyayîşê azadîye bigêrê. 

Partîya ma partîya Newroze ya û Rayber Apo zî rayberê Newroze yo. Embaz Mazlûm Doganî rojêka Newroze de sere wedarit. Coka Rayber Apoyî ey rê vat 'Kawayo Modern.' Ruhê azadîye yê embaz Mazlûmî ganî hol bêro famkerdene. Newroze roja xoverdayîş, têkoşîn û azadîye yo. Ganî ma Newroze kêmasî û xeletîyanê xo raşt bikerê. 

Ez Newroza her kesî fîraz kena. Ez venga her kesî dana ke çalakîyan û şayîyanê Newroze biresno asta tewr berze û meydanan debikero. Ganî meydanan de pêro kurdîstanijî seba azadîya Rayber Apoyî biqîrê. Çunke azadîya ey azadîya kurdan a. Ez venga pêro kesan dana ke na Newroze bikerê bingeyê azadîya Rayber Apoyî.

Selahîyetdarê dewleta tirke û îqtîdarê AKP-MHPyî ancî vera şinê Bexdadî yenê. Vanê ke dişmen ancî amadekarîya hêrişan keno. Dişmen kewto o hal ke her roje verê berê dewletêke de yo. Çunke derbanê gerîlayan ra  tewş bîyo. Gerîlayan bi xoverdayîşê xo faşîzmê AKP-MHPyî ard verê rijîyayîşî. Xora artêşa tirke Zap de kilîdkerde bîye. Dewleta tirke amadekarîya hêrişanê neweyan kena. Ma ney hol zanenê. La ma zî hê amadekarîyanê xo kenê. Dewleta tirke dişmena kurdan a. Ma şerê şarî kenê. Ganî ciwanî na raştîye bivînê û verê xo bidê koyan. 

31ê adare de weçînayîşê girîngî est ê. Ma hêvî kenê ke nê weçînayîşan de hêzê demokrasîyî do ser bikewê û faşîzmê AKP-MHPyî do bin bikewo. Meydananê Newroze de zî şarê ma seba weçînayîşan mesajanê girîngan dano. Şarê kurdî wayîrê ferasetê sîyasî yo. Ganî xebatanê nê weçînayîşan de sere de cinî û ciwanî pêro kesî mesuldarîyan bigêrê xo milî û rayîr nêdê faşîzm û Hîzbulkontrayî. Ganî şarê ma wayîrê îradeyê xo vejîyo, paştî bido namzedanê demokratîkan û cinîyan.

Newroze roja qehremanîya neteweyî ya. Aya ke Newroze rindêr kena xoverdayoxîya Mazlûmwarî û neteweyî ya. Seke zanîyeno Fermandaro Pîl Mahsum Kormaz-Egîd 28ê adara 1986î de Gabar de şehîd bibi. Coka 28ê Adare Roja Qehremanîye ya. Mabênê 21ê adare û 28ê adare zî Hewteyê Qehremanîye yo. Gerîlayî fermandarê ma yê verênî Egîdî ra nata çalakîyanê xurtan kenê û ruhê embaz Egîdî gandar kenê. Ganî ma Newroze Hewteyê Qehremanîye de yew bikerê. Ganî heta 4ê nîsane yanî rojbîyayîşê Rayber Apoyî ma coşê Newroze geş bikerê. Seba ke heta 4ê nîsane Rayber Apo azad bibo ganî ma têkoşînî pîlêr bikerê. Ez ancî Newroza pêro şarê ma û dostanê ma fîraz kena û her kesî rê serkewtiş wazena.''