Endamê Komîteya Rayberdişî ya PKKyî Duran Kalkanî Medya Haber TVyî rê bi wesîleya serrgêra 39. ya Xoverdayîşê Rojeyê Mergî yê Pîlî yê 14ê Temmuze ercnayîşê girîngî kerdî.

Qiseykerdişê Kalkanî ra beşêk wina yo:

''Ez Rayber Apo û xoverdayîşê Îmraliyî, xoverdayîşê pêro zîndanan selam kena. Ewro zî zîndanan de ruhê 14ê Temmuze esto. Îmrali de têkoşînêko pîl esto, xoverdayîşê pîl esto. No têkoşîn çar parçeyanê Kurdîstanî ra, Tirkîya ra, teberê welatî ra û çar hetanê dinya ra vila bîyo. Têkoşînê seba azadîya Rayber Apoyî têkoşînê azadîya her kesî ya.

Ma serrgêra Xoverdayîşê Rojeyê Mergî yê Pîlî de yê. Na çalakîye ewroyî rê tesîr kerd, heta nika dewam kerde, rayîr mojna ma. 14ê Temmuze birêka pîle bîye. 14ê Temmuze rê 'Roja Rûmetê Neteweyî ya Kurdan' vajîyena. Na çalakîye bire daye ke kurdî do azad bibê û rûmetê merdimîye bêro pawitene. Ez afernayoxanê na roje Mehmet Hayrî Dûrmûş, Kemal Pîr, Akîf Yilmaz, Alî Çîçek û şxsê înan de pêro embazanê şehîdan bi rêzdarî yad kena.

Rojeyê Mergî yo Pîl fînalê xoverdayîşê zîndanan ê 1982î bi. Vera rejîmê leşkerî-faşîstî yê 12ê Êlule serkewtişêko pîl o îdeolojîk ame destvistene. Dima no xoverdayîş vurîya bi xeta perwerîya cuya azade, xeta welat, îrade, bawerîye. Serra 40. ya nê xoverdayîşî de ma do pê xoverdayîşê 14ê Temmuze û ruhê serkewtişî yê 14ê Temmuze têkoşîn bikerê û ser bikewê. Ma zî serra 40. de vera dîktatorîya rejîmê faşîstî ya AKP-MHPyî têkoşîn kenê. 

Erdogan şîyo Amed. Kenan Evren zî ge ge şîyêne Amed û qisey kerdêne. Pê vateyê 'welatîyê min ê perwerî' ge ge şîîrî zî wendêne. Ge gefî werdêne ge zî sûcê xo îtîraf kerdêne. 14ê Temmuze ra dima o şi verê Berê Koyî de qisey kerd, Zîndanê Amedî mojna û vat 'Na bîna de merdimî estê ti sereyê înan zî bibirnê bawerîya xo ra fek vera nêdanê.' Erdogan zî sey ey şîyo Amed. Eşkera yo Bidenî tay zor dayo ey. Bi hawayêkê cidîyî o hîşyar kerdo. Erdogan bi xo nêşîyo uca. Amerîka paştî dana şerê vera PKKyî, şerê qirkerdişê kurdan. La rixmê paştdayîşê Amerîka û NATOyî Tirkîya pê PKKyî nêeşkena.

Erdoganî bi nê hawayî vato ke 'Biewnê meseleya bi mi kurdan çin a. Mesele çita ya? PKK yo.' Serekwezîrê Başûrê Kurdîstanî zî heman çîyan vano. Rejîmê AKP-MHPyî senî ke Başûrê Kurdîstanî de PDKyî ra hêz geno wazeno Vakur de zî wina bikero. Coka bi nimitkî rêxistinanê cîyayan awan keno, ajanan wezîfedar keno ke vajo 'Ez nînan muxatab gêna.' Ganî her kes ney hol bizano. Kam bikewo mîyanê ney ajan o, xayîn o. 

Xoverdayîşê gerîlayan Herêmanê PAwitişî yê Medya de bi giranî serê sînorî de yeno kerdene. Xoverdayîş resa Serhed, Amedî ra vila bi. Amed de, Xerzan de çalakîyê pîlî ameyî kerdene. Xoverdayîşê vera dewleta faşîste têna Zap, Metîna û Avaşîn de nîyo. No xoverdayîş AKP û MHPyî rijneno. Herêmanê Pawitişî yê Medya de rewşe cidî ya. Îşxalkerî cayanê ke îşxal kerdê de nêeşkenê zaf bimanê coka PDKyî ra paştdayîş wazenê. PDK bi xo tewrê nê şerî beno. PDK verê rijîyayîşê AKP-MHPyî gêno. Vera ney nêrazîbîyayîşê şarî zaf pîl o. Gelo pawitişê AKP-MHPyî gureyê PDKyî yo?

Wa kes PKKyî qij nêvîno. PKK yeno manaya estbîyayîş û azadîya kurdan. PKK kurd o, kurdo azad o. Vera PKKyî hêrişê giranî yenê kerdene la PKK her ca de xo ver dano. Ganî her kes ney bizano, armancê AKP-MHPyî, armancê dewleta tirke bivîno.

Ê wazenê pê çinkerdişê PKKyî kurdayetîye bi temamî çin bikerê, kurdan bi temamî qir bikerê û Kurdîstan îşxal bikerê. Verê înan de astengîya tewr pîle PKK yo. Ê pê vateyê 'meseleya bi PKKyî esta' xîret kenê kurdan yewbînan cîya bikerê û estbîyayîşê kurdan çin bikerê. Ganî çew nêkewo na dafike. Na rewşe xeylêk tehlûkeyîn a. Ganî ciwanê Başûrî zêdêr vera ney wurzê payan ser.''