Endamê Komîteya Rayberdişî ya PKKyî Duran Kalkanî roportajêk da rojnameyê Yeni Ozgur Politika. Roportajê Kalkanî ra qismo yewin wina yo:

''Ez nameyê PKKyî ser o şarê Lubnanî rê serweşîye wazena, seba birîndaran şîfa wazena. Ez pê bawer a ke şarê Lubnanî reyna do wurzo payan ser.  Şarê Lubnan û Kurdîstanî tim sey wayûbirayan bîyî. Wextê cuntaya 12ê Êlule de şarê Lubnan û Beyrûtî îmkanê xo ma reyde pare kerdî. Înan Rayberîye û partîya ma kerdî meymanê xo. Rayber Apoyî destpêkê 1980an de bi serran Beyrût de Lubnan de xebatî kerdî.

Têgêrayîşê ma seba ke vera cuntaya 12ê Êlule xo ver bido û perwerdeyê îdeolojîk-leşkerîyî bigêro xo apey ant Sûrîye. Gerîlayan warê Lubnanî de rêxistina Filîstînî reyde  perwerde dî. Akademîya Mahsun Korkmazî Lubnan de ronîyaye. Gelîya Beka bîye keyeyê gerîlayan. Rayber Apoyî serra 1979î ra dima 20 serran Lubnan de tay xebatê cîyayî kerdî. Lubnan de merdimî eşkenê tesîrê nê xebatan bîvînê. 

2ê hezîrana 1982î de îşxalê Îsraîlî de partîya ma hem Filîstîn hem zî Lubnanî reyde mil bi mil şer kerd. Gerîlayanê Kurdîstanî Hamleya 15ê Tebaxa 1984î ra verî amadekarîya xo ya peyêne Lubnan de kerde. Na hamle de ked, erj û barê şarê Lubnanî zaf ê. Ma tim sipasdarê înan ê. Coka ma dejê şarê Lubnan û Beyrûtî pare kenê. Partîya ma konferansê xo yo 1. û kongreya xo ya diyîne Lubnan de kerdî. Akademîya Mahsun Korkmazî ya Lubnanî  bîye ocaxê perwerdeyê gerîlayan. Coka ma do şarê Lubnanî qet xo vîrî ra nêkerê.

Faalîyetê Lubnanî yê 1979î û Xoverdayîşê Pîlî yê Zîndanan ra dima gerîlayan bire daye ke verê xco bidê Botan. Tîya de keda Xoverdayîşê Rojeyê Mergî yê Pîlî yê 14ê Temmuze zî zaf a ke ma rê serkewtiş ardo. Serra 1973î de 'Bîyayîşê Rayberîye' ronîyaye, serranê 1973-75î de Anqara de koma Apogîran ronîyaye û na kome destpêkê 1976î de têgêrayîşê 'Şorişgêranê Kurdîstanî' rona. Dima Sêwrege û Hîlwan de ver ajan, dezgeh û şexsan têkoşînê bişîdet ame kerdene û PKK bi hawayêkî fîîlî vejîya werte. Destpêkê 1980an de bi xoverdayîşê zîndanî sahaya Lubnan-Fîlîstînî de tay xebatî ameyî kerdene. Netîceya nê xebatan de gerîlayî ver bi Botanî şîyî. 

Rayber Apoyî Lubnan û Filîstîn de perwerde da bi hezaran gerîlayan. Ma nê esasî ser o şarê Lubnan û Filîstînî reyde bîyî wayûbirayî. Ma pîya vera zaliman têkoşîn kerd û şehîdî dayî. Êlula 1982î ra dima gerîlayî Rojawanî ra şîyî Botan.

Eşîr û şarê Botanî o çax bêhêvî bîyî, vera dewlete bin kewtbi. Ameyîşê gerîlayan seba nînan  sey 'ameyîxê Xidirî' bi. Botan bi kelecanêkê pîlî gerîlayê azadîye û Rayber Apo pêşwazî kerdî. O çax pêro Botan paştî da partîya ma. La dima netîceya polîtîkayanê dewlete de tay cîyatîyî bîyî. Heyf ke qoricîtîye netîceya tedaya TCyî de Botan de ca bîye. La reyna zî Botan de xoverdayîş tim aver şi û 36 serrî yo ke xoverdayîşê Botanî dewam keno.

Ma di cepheyan ra Rojawan û Rojhelatê Kurdîstanî ra dekewtî Botan. Gerîlayî Dêrikî ra ver bi Nisêbînî, Efrînî ra ver bi Sirûcî dekewtî Kurdîstan.  La no sîstem bi hawayêkê zixmî nêamebi rêxistinkerdene.  Êlula 1982î ra dima tay gerîlayî şîyî Botan, tay gerîlayî zî derbazê Başûrê Kurdîstanî bîyî. Ê zî nîsana 1983î ra dima Başûrî ra ameyî Şemzînan, Qileban û Şirnexî. Dima zî Rojhelatê Kurdîstanî ra gerîlayî dekewtî Serhed û Botan.

Seba ke Hamleya 15ê Tebaxe bêra kerdene temmuza 1983î ra dima xeta Colemêrg-Wan-Serhedî ser o dekewtişî bîyî. Komanê verênan amadekarîya seba hamle kerde. Înan  xîret kerdêne ke cografya bişinasnê, şarî reyde têkilîye ronê, amadekarîya madî bikerê. 2ê gulana 1983î de îdarekarê nê amadekarîyan Mehmet Karasungur şehîd bi. Coka hamle ameye taloqkerdene. Coka hamle serra 1984î de ameye kerdene.

Gerîlayê cinîyî hêverî serê Rojhelatê Kurdîstanî ra dekewtî Botan û Vakurê Kurdîstanî. Serranê 82-83î de komanê Rojawanî de gerîlayê cinîyî çinbî. Serra 84î de gerîlayê cinîyî dekewtî Botan. Hamleya 15ê Tebaxe ra dima zî cinîyan zêdêr koman de ca giewt.

Xebatê koma verêne tay problematîk bîyî. Rayber Apoyî na raştîye dîye û rexne kerde. Dima nê problemî ameyî çareserkerdene û kombîyayîş û planan ra pey wisarê 84î ra dima gamê aktîfî ameyî eştene. Gamê verênî tay qij bîyî. Çalakîyanê Dih û Şemzînanî yê 15ê Tebaxe proseso raştikên vet meydan.