Endamê Komîteya Rayberdişî yê PKKyî Duran Kalkanî  derheqê şahadetê Endamê Komîteya Merkezî ya PKKyî Kasim Engînî de Madya Haberî rê qisey kerd.

Qiseykerdişê Kalkanî ra qismêk winayo:

Dej û hêrsê ma gird o

''Fermandaranê HPGyî ra hemra Kasim Engîno ke wezîfeyê endamîya merkezê PKKyî û Konseya Rayberdişî ya KCKyî rayra berdene nêtîceya hêrişê dişmenê faşîstî de şehîd kewt.  Bêşik sey têgêrayîş û şarî dej û hêrsê ma gird o. Sere de Rayber Apo ez dejê heme hemrayan, keyeyanê şehîdan û şarê ma yo welatperwerî pare kena. Hemra Engîn do timûtim bêro ciwîyayene û waştişê ey bêrê caardene. Ganî me heme nê mîlîtanê fedaîyî ke emrê xo da azadîya şarê kurdî û merdimîye, raşt fam bikerê û raşt wayîrê ci bivejîyê. O şerwanê ke azadîye û fermandarê gerîlayan bi. O rayberêkê şarî û hunermendêk bi.  O mîlîtanêko şorişgêr bi ke her tewir wezîfeyî her tim bi serkewtiş ardêne ca.

Verê xo da welatê xo yo ke xelisîyayîş paweno

Serranê xo yê qican de welat û şarê xo ra ame qerifnayene û ame berdene Ewropa. Mecbur mend ke pîya bi keyeyê xo şiro surgun. La hemra Kasim Engînî bado ke felsefeya azadîye ya Rayber Apoyî nas kerd heme îmkanê modernîteya kapîtalîste yê ke koletîye îfade kenê pê pêkîya destê xo red kerdî  û resa welatê xo yo ke xelisîyayîş paweno. Bi Rayber Apo, têgêrayîşê azadîye, gerîla, şarê kurdî û koyanê Kurdîstanî ame têhet. Amanosan ra heta Botanî, Zagrorasan ra heta Behdînanî, Rojawanî ra heta Rojhelatî çar leteyanê Kurdîstanî ra gêra. Rêça Bêrîvanan de rayra şi û bi hemrayê Erdalan, Huseyîn Çelebîyan, Nucanan û Şêxoyan.

O xo ser sey artêşêk bi

Qet nêvindert û nêqefilya. Çirey çîyêk zî hemra Kasim Engîn dewaya azadîye ra helêke zî dûrî nivist. Her tim rîyê ey de huyayîş mezgê ci de ûmid û zerrîya ci de bawerîya azadîye estbî. 35 serrê emrê xo dayê têkoşînê azadîye yê şarê kurdî, demokratîkbîyayîşê şarê Rojhilatê Mîyanênî û xelisîyayîşê merdimîye. Her tim xeta şehîdanê ma yê qehremanan û Rayber Apoyî de serkewtiş esas girewt û goreyê naye têgêra. Hemrayêko bêhempa bi. Perwerdeyî ra heta şerî, îdareyî ra heta xebata şarî her wezîfe û berpirsîyarîye bi coşêkê girdî girewtêne xo ser û vera teslîmîyet û îxanetî sereberz têkoşîn dayene. Xo ser sey artêşêk bi.

Şehadetî têkoşînê azadîye xurtêr kenê

Êyê ke vanê qey bi şehadetê hemra Kasim Engînî waştişê înan ê qirkerdişê kurdan ameyo ca zaf xeletîyenê.  Şahadetê ey do hemleya azadîye, hemleya qesasî ya şorişgêre rê rayberîye bikero.  Na hemle do faşîzmê AKP-MHPyî serûbin bikero. Şarê ma do miheqeq ser bikewo. Wa hêzê faşîst û qirkerdî hole bizanê ke ê ne eşkenê PKKyî biqedînê ne zî vernîya têkoşînê gerîlayan bigêrê. Sey her şehadetî do şehadetê hemra Kasim Engînî zî hêzê gerîla û şarê ma hîna perwerde bikero, hêrsê înan girdêr bikero ke têkoşînê xo xurtêr bikerê û qesasê şehîdanê xo bigêrê. Naye ra şikê ma çîn o wa şikê çewe/î zî çînê bo. Sîstemo qirker do mîyanê dejanê ke afernayî de bifatisyo.

Hesab ame, yeno û do bêro persayene

Qesasê hemra Kasim Engînî do pê girdkerdişê têkoşînî bêro girewtene û waştişê ey bêrê caardene.  Qetilkaranê ey ra do hesabê naye bêro persayene.  Xora hesabê vizêrî ame persayane, ewro yeno persayene û do siba zî bêro persayene. Sere de cinîyî çar leteyê Kurdîstan û Ewropa de şarê ma ganî hemra Kasim Engînî raşt fam bikero û vejîyo kuçeyan têkoşînî gird bikero. Ez bawer kena ke prosesê verê ma sey Hemleya Qesasî ya Kasim Engînî bêro averberdene û pê na hemle peynîya îqtîdarê faşîstî bêro ardene. Pê hemleya winayêne faşîzm do birijîyo,ma ser bikewê, şarê ma ser bikewo.''