Rayberê Şarê Kurdî Abdullah Ocalanî 21 serran ra dima reya verêne pê telefonî birayê xo reyde qisey kerd. Endamê Komîteya Rayberdişî ya PKKyî Duran Kalkanî mesajê Abdullah Ocalanî ANFyî reyde ercnayî.

Qiseykerdişê Kalkanî ra beşêk wina yo:

''Rayber Apoyî qiseykerdişê xo de ruhê yewîya neteweyîye, rêxistinbîyayîşê ci û têgêrayîş ser o vindert. Seba awankerdiş û averberdişê Rayberîya Neteweyîye astêka zaf berze vete vernî. Ganî no çi bêro dîyene.

Protokolê 1982î yo ke Rayber Apoyî qala ci kerde, dokumentêkê Îtîfaqê Demokratîk û Neteweyî yo ke 11 madeyan ra yeno meydan. Bi taybetî embaz Mehmet Karasungurî seba ke mabênê PKK û PDKyî de îtîfaqêk bêro kerdene wina xîret kerd. Bi wesîleya serrgêra 37. ya şehadetê ci ez ey yad kena. Nê xîretan ra dima serra 1982î de no protokol ame kerdene. Serra 1983î de zî Rayber Apoyî û Serekê PDKyî Mesud Barzanîyî no protokol îmza kerd. Ma o çax rêxistinanê kurdan û tikan ê bînan reyde zî protokoê winasênî îmza kerdî. Îtîfaqê PKK û PDKyî esasê haştîye ser bi, dima YNK zî tewrê nê protokolî bi.

Eke ma qala nê protokolî bikerê, ma ewro zî eşkenê nê madeyan îmza bikerê. Eke îdareyê PDKyî qebul bikero, ma reyna eşkenê îmza bikerê. Çunke made û prensîbê ci girîng ê û protokol çarçewa demokrasî û neteweyî de yo. Tede qala yewîya parçeyan, pêkerdişê rêxistinan, averşîyayîşê demokratîkî yê neteweyî yê kurdan, çareserîya dewaya kurdan yena kerdene. Beno ke eşkîyeno tay bêro vurnayene.

1982î ra tepîya PKK û PDKyî na rewşa 'haştîyane' ra fayde dî û ser kewtî. Ruh, hîs û yewîya neteweyî ya kurdan ser kewtî. Têgêrayîşê Azadîye yê Kurdan destkewtişê pîlî vistî destî. La reyna o çax hêzêk vejîya meydan ke waştêne ke meseleya kurdan ra fayde bivîno. Gama înan a yewine zî parçekerdişê îtîfaqî bîye. O wext zî seba têkilîye PDKyî verê xo da Tirkîya. Tay hêzanê NATOyî û DYA no kerd. Înan pêkerdişê mabênê PDK û PKKyî parçe kerd. Ganî raştî wina bêra dîyene û zanayene. Bi kilmî ma hema zî girêdayîyê ruh û muhtewaya nê protokoloî yê.

Nika no protokol senî eşkîyeno bêro newekerdene? Partîyî eşkayêne mabênê xo de têkilîyêke bironê la hînî çaxê ney vîyart. Hînî partîyî eşkenê platformêkê neweyî awan bikerê û hîşmendîyêka yewîya netweyîye awan bikerê. Kongreya Neteweyî ya Kurdîstanî naye îfade kena.

Nika PKK, PDK û YNK eşkenê esasê peymana Kongreya Neteweyî ya Kurdîstanî ser o protokolêk newe bivirazê û pêro partîyî zî ganî bieşkê ke tewrê ci bibê. Ma seba averşîyayîşê têkilî û hîşmendîya neteweyî amade yê. Ma hema zî girêdayeyê ruh, cewher û prensîbanê Protokolê 1982î. Ma eşkenê nê esasî ser o pêkerdiş, têkilî û pêvînayîşan aver berê.

Vengdayîşê Rayber Apoyî yê seba yewîya neteweyîye zaf girîng bi. Ganî merdimî seba naye zêdêr têkoşîn bikerê, bixebitê. Rayberîye veng da û vat ke zêdêr kefaret bêro dayene., seba çareserîya pêro alozîyan dîyalog bêro kerdene.

Rayber Apoyî aslê xo de vengdayîşê PKK, PDK û YNKyî reyde seba awankerdişê Kongreya Neteweyîye zî veng da. Ma zî vengdayîşê Rayber Apoyî dibare kenê ma vanê ma meseleyanê xo pê dîyalogan çareser bikerê. Ma nêwazenê ke pê gonî meseleyî çareser bibê. Ma hêvî û bawer kenê ke muhatabê ma na raştîye vînenê, goreyê ci têgêrenê û pê kayanê kolonyalîstan nêxapîyenê. Eke muxatabê ma vr bi hetê ma gamêke bierzê ganî her kes bizano ke ma zî ver bi înan di gaman bierzê.

Rijîyayîşê gonî fayde nêdano kurdan. Rayber Apo zî vano 'Hînî wa gonî nêrija.' Rijîyayîşê gonî ê kesan rê ke wazenê mabênê kurdan de mesele virazê, tehrîk bikerê, alozîya mabênê kurdan geş bikerê, fayde keno. Ganî ma tewirêko winasên bimojnê ke xizmetê dişmenan nêkero, zerar nêdo şarê ma, azadîye û demokrasî.

Sey Başûr Rojawanê Kurdîstanî zî herêmeka îmkanê girdkerdişê demokrasî û yewîya demokratîke ya kurdan estî ya. Tîya sîstemo demokratîk eşkeyanê aver şiro ke naye paştî dayenê xebatanê têkoşînê azadîyê yê kurdan ê bînan. La senî ke eyseno nê babetan de problem esto. Destê hêzanê teberî û herêmkî mîyanê nê warî de yo. Her kes wazenê goreyê karanê xo bikero. No zî vernîya averşîyayîşî de beno asteng. Nimûneyê Rojawanî de yew tengayî esta. Nizdîbîyayîşê wa tay bo wa yê mi bo raşt nîyo. Wa gird bo wa yê ma pêrune bo. Rayber Apoyî hêver zî vatbi wa têna pê Rojawan bisînor memano wa sîyaseto demokratîk heme  Sûrîye ra vila bo. Semedê çareserkerdişê probleman xebatî yenê rayraberdene. Xora çapemenî de zî yenê vînayene û ma teqîp kenê. Rayber Apo zî nînan rexne keno. Eke paradîgmaya Reyber Apoyî esas yena girewtene ganî goreyê ci bêro têgêrayene ke tengayîya herêmkî werte ra bêro wedartene.''