Endamê Komîteya Rayberdişî ya PKKyî Duran Kalkanî bi wesîleya 1ê Gulane Roşanê Karkeran ANFyî rê qisey kerd û tay ercnayîşî kerdî.

Qiseykerdişê Kalkanî ra beşêk wina yo:

''PKK yanî Partîya Karkeranê Kurdîstanî partîyêka karkeran a û destpêkî ra nata PKKyî kerd ke 1ê Gulane goreyê girîngîya ci biercno. PKKyî tim 1ê Gulanan reyde xo aver berdo, newe kerdo û bîyo pîlêr. Na raştîye komelê Kurdîstanî ra azade nîya; çunke komelê Kurdîstanî karker û kedkar o. Bi hezaran şehîdê ma yê 1ê Gulane est ê.

Wexto ke dewa Fîsî de 26-27ê teşrîna peyêne ya 1978î de kongreya ronîyayîşî amebî kerdene, derheqê nameyê partîye de zî tay nîqaşî qewimîyayî. Sey Mazlûm Doganî tay embazan waştêne ke nameyê partîye bibo 'Partîya Komunîste.' La seba ke şarî reyde ma bibîyêne yew nameyê 'Partîya Karkeran' ma rê hîna raşt ame. Peynîya nîqaşan de axir nameyê partîye bi 'Partîya Karkeran a Kurdîstanî.' Xora nameyê komunîsmî îdeolojîyêke pênase kerdêne la nameyê partîya karkeran sinifî temsîl kerdêne. 

PKKyî tim Yewîya Sovyetan rexne kerdêne. Çunke Sovyetan xo rê sosyalîzmo reel esas girewtêne û paştî nêdayêne têkoşînê kurdan. PKKyî reyna serranê 1980an de rêxistinanê xelisnayîşê Filîstînî de pêvînayîşî kerdî. Rayber Apoyî zî di reyî temsîlkaranê welatanê sosyalîstanê reelan de pêvînayîşî kerdî. 90an ra pey dima ke sosyalîzmo reel rijîyayo PKKyî ancî tim têgêrayîşanê karker û kedkaran de pêvînayîşî kerdî. Bi taybeyî dima ke fikrê Rayber Apoyî vila bîyî,  xeylêk rêxistinan, sendîkayan û têgêrayîşanê karker û kedkaran paştî daye têkoşînê kurdan. Têkoşînê ma yê vera DAÎŞî û Şorişê Rojawanî de zî enternasyonalîstan hetê ma de ca girewt. Ewro ma kampanyayanê seba Azadîya Rayber Apoyî de zî vînenê ke xeylêk têgêrayîş, sendîka û rêxistinê karkeran PKKyî reyde têkilîye û îtîfaqan virazenê.

Tay kesî vanê 'PKK hetê MÎT, CIA ûsn ra ronîyayo', tay kesî vanê 'PKK têgêrayîşêkê pratîkan o.' La PKK têgêrayîşêkê Rayberîye yo, hêzêko pîl o teorîk o. Teorîya PKKyî pratîkê ci ra pîlêr a. Tay kesê bînî zî est ê ke têna hetê neteweyî yê PKKyî vînenê la hetê ci yê komelkîyî nêvînenê. La PKK têgêrayîşê azadîye yo neteweyî û komelkî yo. PKK verî pê hetê xo yê neteweyîyî şinasîya la dima na rewşe vurîyaye. Tay rêxistinan îdîa kerd ke PKK têna têgêrayîşêko neteweyî yo û înan xîret kerd ke PKK teber de war verdê. La dima hetê komelkîye yê PKKyî vejîya vernî. PKK hetê têgêrayîş û pratîkî ra yew o, tede nakokîye çin a. 

PKK verî mîyanê têgêrayîşê şorişgêrî yê Tirkîya de vejîya werte, dima tira qerifîya û hîna bi bihêz û aver şi. Rayber Apo mîyanê têkoşînê vera Darbeya 1971î ra vejîya. Ciwanê şorişgêrî dormeyê ey de ameyî yewca. Yanî PKK mîyanê adirê têkoşînê Darbeya 1971î de pewjîya. PKK dima bi partîya kurdan û Kurdîstan de têkoşîn kerd. Darbeya 12ê Adare ra dima zî Rayber Apoyî û koma Apogîran newe ra rêxistinbîyayîşê Têgêrayîşê Ciwananê Şorişgêran ê Tirkîya de rolê pîlî ardî ca. Reyna vera Darbeya 1980î têgêrayîşanê kurdan û tirkan pîya têkoşîn kerd. PKKyî tim giranîye daye têkoşînê hemparî. La şovenîzm û opurunîzmê têgêrayîşanê şorişgêran ê Tirkîya ra yewîya têkoşînê kurdan û tirkan nêbîya yew. Têgêrayîşanê şorişgêran ê Tirkîya kurdî qij dîyî û vat 'Eke kurdan rê azadîye lazim a, ma do na azadîye bîyarê.' No kîbr o. Xora înan bi hawayêkê xurtî vera Darbeya 1980î têkoşîn nêkerd û têkoşînêkê gerîlatîye nêvet werte. 

HBDH wazeno şorişê Tirkîya bîyaro ca, cuya azade, azadîya cinîyani cuya demokratîke armanc keno. Nê hedefî hedefê PKKyî yê zî. HBDH mutefîqê PKKyî yo. HBDH mîyanê têgêrayîşanê şorişgêran ê Tirkîya de nêzdîbîyayîşê bi meseleya kurdan şikna, o şovenîzmo sosyal war verda. HBDH têkoşînê kurdan înkar nêkeno, paştî dano ci. Coka HBDHyî reyde têkilîya ma yê dostanîye est a. HBDHyî felaketê ke 'Planê Çokdayîşî' yê AKP-MHPyî do bîyarê, dîyî û vera ney têkoşîn keno. Ewro têna HBDH vera faşîzmê AKP-MHPyî şer keno, derbe dano ci. HBDH metropolanê Tirkîya de şer vila keno. HBDHyî xeta xo ra fek vera nêdayo û xeta şorişgêre temsîl keno. Îqtîdarê AKP-MHPyî zî tewr zaf HBDHyî ra tersa coka vera HBDHyî 6 serrî yo operasyonanê pîlan keno. Kêmasîya HBDHyî na ya ke hêrişê AKP-MHPyî rew nêdîyî û tedbîr nêgirewt. 

Nika dewlete vera Herêmanê Pawitişî yê Medya hêrişanê îşxalî kena, dewleta tirke hêrişê Şingal û Rojawanî zî kena, Vakur de kurdan rê îşkence kena, tepişnena. Ganî ma vera nê hêrişan pêro hêzanê xo sewqê têkoşînî bikerê, potansîyelê xo bivînê, xo hîna zaf rêxistin bikerê, vera faşîzî şerê şarî yê şorişgêrî bikerê. AKP-MHP hê hêrişê Zap û Avaşînî kenê. Gerîlayî û şarî vera ney xo ver danê. Îqtîdar seba ke emrê xo derb bikero nê hêrişan keno. Nê prosesî de erkê HBDHyî zî no yo ke şaristanan de xoverdayîş aver bero û bikero ke ciwan û cinîyî vera hêrişan têbigêrê. HBDH bi nê hawayî eşkeno kêmasîyanê xo telafî bikero.''