Endamê Komîteya Rayberdişî ya PKKyî Duran Kalkanî beşdarê bernameyê taybetî yê Medya Haber TVyî bi û rojdem ercna.

Qiseykerdişê Kalkanî ra beşêk wina yo:

''17 mengî yo ma Îmraliyî ra xeberêke nêgênê. Vera tecrîdî Hemleya Wextê Azadîye her ca de pîl bena. Ganî her ca de vera tecrîdê Îmraliyî têkoşîn bêro pîlkerdene û metodê nê têkoşînî zengîn bibê. Wa her kes seba azadîya Rayberîye erk û mesuldarîyanê xo bîyaro ca.

Destpêkê hêrişanê 14ê nîsane ra nata artêşa îşxalkere serkewtişêk zî nêvisto xo destî. Gerîlayî her roje çalakîyanê qesasî kenê û derban danê îşxalkeran ro. Wezîrê Karanê Zereyî ameyo heta Çelê û vato qey moralî ameyo. Yanî moralê artêşa tirke xirab o. Artêşa îşxalkere sendromê Zapî de yo. Ê kewtê mîyanê sendormê Avaşîn, Metîna, Kurdîstan. Gerîlayî xeta qehremanîye de têgêrenê. Qet yew hêz nêeşkeno sey gerîlayan şer bikero. Serkewtişo tewr pîl do Zap de bibo. Artêşa îşxalkere bîya har, sey barbaran hêriş kena. No zî mojneno ke rijîyayîşê AKP-MHPyî nêzdî yo.

Dewleta tirke çeka kîmyewîye, termobarîk, bombaya nuklere şuxilnena. 2017 ra nata artêşa tirke vera Herêmanê Pawitişî yê Medya çekanê qedexekerdeyan şuxilnena. Belge û îtîrafê înan est ê. Nê çek û bombayî aîdê NATO, Amerîka û welatanê Ewropa yê. Kurdî û dostê înan ganî na babete teşhîr bikerê, têkoşînê vera çekanê qedexekerdeyan pîl bikerê.

Ganî merdim Qirkerdişê Zaxoyî û Qirkerdişê Qamişloyî yanî qetilkerdişê Jîyane Tolhildan û embazanê aye pîya biercnê. Erdogan seba ke reyna hêrişê Rojawanî bikero NATOyî ra, Tehran ra destût waşt. La wird terefan zî destûr nêda. Qirkerdişê Zaxoyî naye ser o qewimîya. No qirkerdiş plankerde yo. Dewleta tirke seba ke Zap de teng menda qirkerdişêko winasên kerd. Erdogan zaneno ke weçînayîş de bin bikewo coka wazeno hêrişê Rojawanî bikero û bi nê hawayî şovê neteweperwerîye bikero. Erdoganî bi Qirkerdişê Zaxoyî Îran û Iraqî rê, bi Qirkerdişê Qamşloyî zî Koalîsyonê Mîyanneteweyî rê gefî wendî.  Artêşa tirke xora waştêne Zaxo bi temamî bêro vengkerdene la wina nêbi. Eke verê hêrişanê Erdoganî nêro girewtene Erdogan do mîyanê Iraqî de zî alozîye vejo.

Şingal bi keda gerîlayan, şerwananê Rojawanî û şarê Şingalî ame xelisnayene. Şingal de şehadetê pîlî qewimîyayî. Ferman ho keweno serra 9. Tirkîya tim hêrişê Şingalî kena. Komelê êzidîyan wazeno wayîrê îdare, sîstemê xo yê xoserî bibo. Şingal de têkoşînêko pîl est o. Ganî no têkoşîn bi qerardarî bêro kerdene. Ganî şarê êzidîyan rêxistinîya xo bîyaro ca ke raştê fermananê neweyan nêro.

Ma serrgêra 39. ya Hemleya 15ê Tebaxa 1984î de yê. Ma dest pê serra 39. ya xoverdayîş û serkewtişî kenê. Ruhê Hemleya 15ê Tebaxe Zap, Avaşîn û Metîna de berz beno. Embazê ma bi nê ruhî xo ver danê.

Şar serkêşîya Rayber Apoyî û PKKyî de bi çêrî, fedakarî, serkewtişî xo ver dano û 15ê Tebaxe temsîl keno. Bi ruhê Hemleya 15ê Tebaxe ganî her roje tebaxe de têkoşîn bêro kerdene. Ma do bi ruhê Hemleya 15ê Tebaxe, serra 50. ya têgêrayîşê xo de do ser bikewê. Ma venga embazan, şarê xo û dostanê xo danê ke bi nê tewirî xoverdayîşî geş bikerê.''