Endamê Komîteya Rayberdişî ya PKKyî Kalkanbi wesîleya serrgêra 25. ya Komployê 9ê Teşrîna Verêne ya 1998î ANFyî rê qisey kerd.

Qiseykerdişê Kalkanî ra tay noqtayê girîngî wina yê:

''Seba ke raştîya Rayberîye hol bêra famkerdene ganî xoverdayîşê ci yê Îmraliyî bêro famkerdene. Zîndanê Îmraliyî de komplo dewam keno. 25 serrî yo bi sîstemê Îmraliyî hêrişê Rayberîye yeno kerdene. Hetê bînî ra hêzê qirkerî seba ke meseleya kurdan nêra çareserkerdene sîstemê Îmraliyî anê ca. Dewleta tirke bi xo kurdan înkar kena û çin kena û nasnameyê tirkayetîye ra ber çîyê bînî qebul nêkena. 

Dewleta seba ke verê kurdan yanî verê Rayberîye bigêra zaf xîret kerd. Tewr peyên 1998 de bi komployî Rayber Apo ame esîrkerdene. Dişmenî armanc kerd ke pê komployî Rayber Apo, PKK, têgêrayîşê ma û kurdan îmha bikero. Sîstemê globalî zî destek da komployî. Mîyanê plankaranê komployî de Îsraîl, Amerîka Îngilîstan, Fransa  est ê. 

Rixmê nê kerdişan û sîstemê tecrîd û qirkerdişî yê Îmraliyî zî Rayber Apo nêvindert û paradîgmaya xo awan kerde. Ey nêvat ke îmkanê ci çin o. Rayber Apoyî bi paradîgmaya xo rayîrê çareserîya meseleya kurdan mojna. La dewlete bi teda û girankerdişê Îmraliyî cewab da ci. Komplogerê mîyanneteweyî seba ke qirkerdişê kurdan de israr kenê û Rayber Apoyî ra qesas bigêrê tecrîdî kenê giranêr. Çunke nê hêzî paradîgmaya Rayberîye ra tersenê. 

Ewro Komployo Mîyanneteweyî xo sey sîstemê Îmraliyî dano dewamkerdene. Bi nê sîstemî qirkerdişê vera kurdan dewam keno û îradeyê cinî û ciwanan yeno xespkerdene. Heta ke Rayber Apo azad nêbo qet yew kurd/e, cinî, ciwanî û binestî azad nêbenê. 25 serrî yo no sîstem vera pêro destkewteyanê kurdan keno hedef. 

A raşte 9ê teşrîna verêne ra verê cû ame waştene ke Rayber Apo pê yew suîkastî bêro çinkerdene. La nêeftayî. Coka Rayber Apo ame remnayene û 15ê sibate de Tirkîya rê ame dayene. Îşte ê çaxî ra nata Îmrali de hêriş, qirkerdiş, teda û tecrîdo mutleq est ê. A raşt nê kerdişî şexsê Rayberîye de vera kurdan yenê cardene. 

Coka xoverdayîşê Îmraliyî yê Rayber Apoyî vera pêro sîstemê qirkerdiş û îmha yo. Ewro teyna şiknayîşê Îmraliyî do çare nêbo. Ganî Rayber Apo azad bibo ke meseleya kurdan bêra çareserkerdene û qirkerdişê kurdan biqedo. Serra 26. ya Komployê Mîyanneteweyî de ma vera berhemanê ci tecrîd û qirkerdişê Îmraliyî esasê azadîya Rayber Apoyî û çareserîya meseleya kurdan de têkoşînî berz bikerê.''