Endamê Komîteya Rayberdişî ya PKKyî Duran Kalkanî Medya Haber TV de derheqê Komployê 9ê Teşrîna Verêne ya 1998î, tecrîdê vera Rayberê Şarê Kurdî Abdullah Ocalanî û şerê Kurdîstanî de qisey kerd.

Qiseykerdişê Kalkanî ra tay noqtayê girîngî wina yê:

''Tecrîdê vera Rayber Apoyî bi giranî dewam keno. Cewab nêdîyeno muracatanê avûkatan û keyeyî. Xora vera tecrîdî hîsgerîyêka pîle est a û têkoşînê vera tecrîdî beno pîlêr. Kurdîstan û dinya de seba azadîya Rayber Apoyî çalakîyê pîlî yenê kerdene. Hînî no tecrîd her kesî aciz keno. Eke haştîya tirkan û kurdan do bêra kerdene ancax Rayber Apo eşkeno ney bikero. Ma teyna şer kenê. La çareserîya sîyasîye de tek adres Rayber Apo yo.

Ma hê kewenê serrgêra Komployê 9ê Teşrîna Verêne. Ganî ma emser têkoşînî hîna pîl bikerê û azadîya Rayber Apoyî hedef bikerê. Hînî her kes wazeno ke sîstemê Îmraliyî bêro parçekerdene. Ganî ma na raştîye bivînê ke Komployo Mîyanneteweyî pê tecrîdê Îmraliyî dewam keno. Sîstemê Îmraliyî sîstemê îşkenceyî yo. Tede qet yew qanûn nêno caardene. Ewro no sîstem pêro Tirkîya û Vakurê Kurdîstanî îdare keno. Coka kesê ke azadîye wazenê ganî hêverî vera sîstemê Îmraliyî têkoşîn bikerê. 

Nê 25 serran de şarê ma, têgêrayîşê ma, cinîyan, ciwanan û gerîlayan vera komployî têkoşînêko pîl kerd û şehîdî dayî. Kamî meseleya kurdan de çareserîye nêwaşta komplo ard ca. Komployî armanc kerdbi bi Rayber Apoyî îmha bikero. La nê 25 serran de Rayber Apoyî bi paradîgmaya xo komplo pûç kerd. Bi komployî verê çareserîya meseleya kurdan û haştîya Rojhelatê Mîyanênî ame girewtene. La Rayber Apoyî Îmrali de zî seba haştîye tim xîret kerd û 25 serran de hişmendîya azadîye ya kurdan zêdîyaye, Şorişê Rojawanî qewimîya û felsefeya Jin, Jiyan, Azadî vilayê pêro dinya bîye.  Eke Rayber Apo azad bibo zî komplo bi temamî do bêro çinkerdene.

Yanî nê 25 serran de rixmê sîstemê Îmraliyî zî kurdan destkewteyê pîlî vistî destî. Naye ra pey zî ganî têkoşînê vera sîstemê Îmraliyî her ca de bêro kerdene. Ganî ma nê têkoşînî bikerê têkoşînê azadîye yê globalî û bivurnê têkoşînê demokrasî yê bingeyînî. Ma do hêverî zî Eroganê dîktatorî bişawê. Ma pê bawer ê ke do ser bikewê.

Gerîlayî çar parçeyanê Kurdîstanî de vera dişmenî xo ver danê. Gerîlayî serkêşîya têkoşînê azadîye kenê. Bi taybetî Herêmanê Pawitişî yê Medya de şer bi giranî dewam keno. Artêşa tirke ya îşxalkere her ke nê şerî de teng bena bombardumanan kena û çekanê qedexe û kîmyewîyan şuxilnena. Dewleta tirke nê şerî de xeylêk kişteyan dana la pêro raştîyan zî şarî ra nimnena. 

Hetê bînî ra çarçewa şerê taybetî de vera cinî û ciwanan polîtîkayê taybetî yenê caardene. Dewleta tirke kena ke ciwan û cinîyan kulturê kurdayetîye ra dûrî bivisna û bi nê hawayî zî têkoşînî ra apey verbida. Ganî bi taybetî cinîyî vera nê kerdişan çeke bigêrê xo destî. No şer teyna şerê gerîlayan nîyo, şerê ma pêroyînan o. Ganî cinî û ciwanî bibê wayîrê ê hezî ke bieşkê xo bipawê. Seba azadîye xoverdayîşî ra ber rayîrêko bîn çin o.''