Endamê Konseya Rayberdişî ya KCKyî Mustafa Karasuyî bernameyêkê taybetî yê Medya-Haber TVyî de rojdem ercna. Qiseykerdişê Karasuyî ra tay noqtayê girîngî wina yê:

''Ez şexsê şehîdanê Qirkerdişê Parisî de pêro şehîdanê menga çeleyî bi rêzî yad kena. Embaza ma Sara (Sakîne Cansiz) ronayoxanê partîya ma ra yewe bîye û serkêşanê xoverdayîşê zîndanan ra zî bîye. Embaze Sara reyde xeta cinîyan ê azadan dest pêkerd û vila bîye. Rayber Apoyî zî seba şehadetê aye vatbi 'Terteleyê Dêrsimî yo Diyîn.' Qirkerdişê Parisî de MÎTî raşta raşte a kerdibî hedef. Ewro pêro dinya de têkoşînê embaze Sara aver şino.

23yê teşrîna verêne ya 2024î de Rayber Apoyî Omer Ocalan de pêvînayîş kerdbi. Rayber Apoyî uca de vatbi ke tecrîd dewam keno. Xora teyna bi yew pêvînayîşî tecrîd nêqedîyeno. Bi polîtîkayanê dewleta tirke bawerîye nêbena. Çira Rayber Apoyî reyde pêvînayîş yeno kerdene? Çunke herême mîyanê krîzan de y. Rayber Apo îradeyê şarê kurdî yo û îradeyê çareserîye yo. 

Rayber Apo çîyo ke goreyê menfaetanê şarê ma nîyo, do nêkero. Her kes ney zaneno. Rayber Apoyî vato ke o do paştî bido xîretanê çareserîya demokratîke. Rayber Apoyî pêvînayîşê xo yê bi DEM Partî de zî heman çi ardo ziwan. Rayber Apoyî waşt ke wa vurîyayîşêko demokratîk bêro kerdene. Eke prosesêk do bêro kerdene ganî no proses demokratîk bibo. 

Bazarîyê tayê çîyan nêbenê. Heqê kurdan ê meşrûyî est ê ke bazarîya nînan nêbena. Perwerdeyê bi ziwanê dayîke, xoserîye ûsn. Nê heqê meşrûyî yê. Ma sey têgêrayîşî tim paştî danê xîretanê Rayberîye. Hetê bînî ra îqtîdarî reyde muxalefet zî ganî nê prosesî de samîmî bibo. Coka Rayber Apoyî vato 'Meclîs cayê nînan o.'

Hendê nîqaşan reyde tecrîd zî dewam keno. Eke dewlete samîmî ya wa tecrîdî wedarna. Eke nê pêvînayîşî ameyî kerdene nê netîceya têkoşînê kurdan de bîyê. Şarê kurdî bi têkoşînê xo zor da dewleta tirke û îqtîdarê AKP-MHPyî.

Goreyê mi Hemserekê DEM Partî ganî mîyanê heyetê Îmraliyî de ca bigêrê. Seke mi vat ma hertim paştî danê qiseyanê Rayber Apoyî. La ganî ma verê kayanê dewlete de zî tim hîşyar bibê. Ganî têkoşînê ma dewam bikero.  Ganî Hemleya Azadîye bêra pîlkerdene.

Rejîmê Şamî bi paştdayîşê hêzanê mîyanneteweyîyan ê bi HTŞyî rijîya. Xorinbîyayîşê krîzê Sûrîye de zî rolê Tirkîya pîl o. Sûrîyeya newîye do goreyê asayîşê Îsraîlî bêra dîzaynkerdene. Xora lîderê HTŞyî Golanî zî wina mojneno ke ê do seba Îsraîlî nêbê tehlukeyî. Hetê bînî ra dewleta tirke hema zî kena ke Sûrîye rê xo ferz bikera û sîstemêkê merkezî awan bikera. La Sûrîyeya merkezpereste hinî do nêba. Sûrîye kozmopolît a û neçare ya ke demokratîk biba. Sûrîyeya newîye de ganî kurdî, cinîyî û şarê bînî wayîrê qiseyan bibê.

Artêşa Milî ya Sûrîye (SMO) çeteyê dewleta tirke yê. Her ca de SMO vera şerwananê Rojawanî nameyê dewleta tirke ser o şer keno. Xora paştdayîşê hewayî yê dewleta tirke ra nêbîyêne SMO rewî ra Rojawanî ra remayêne. Çend hêrişî bibê zî şarê Rojawanî do heta peynî sîstemê xo bipawê. 

Bi paştdayîşî Kobanê ser kewtbi. Nika zî no paştdayîş lazim o. Ganî  her kes paştî bido nobetanê Pirsûs û Nisêbînî. Ganî çalakîyê paştdayîşê bi Rojawanî hîna bi xurt bêrê kerdene.

Hukmatê Iraqî nêzaneno ke ho sekeno. Dewleta tirke do çîyêkê xirabî bîyara sereyê Iraqî. Ma fam nêkerd ke çira Silêmanî de dezgehê cinîyan yenê qfilnayene? Ganî YNK nê xeletîyan ra abigêro.

2024 bi serra têkoşînî. Ez pêro şehîdanê 2024î şexsê embazanê ma Asya û Rojgêrî de yad kena. Gerîlayan 2024 de têkoşînêk û xoverdayîşêko pîl kerd. Ma bi na qerardarî kewtê 2025î. 2025 de ma do têkoşînê xo aver berê, xeta Rayberîye û PKKyî aver berê. 2025 de serkewtişê pîlî do bêrê destvistene. Nê esasî ser o ez serra 2025î fîraz kena. Her kesî rê serkewtiş wazena.''