Endamê Konseya Rayberdişî ya KCKyî Mustafa Karasuyî Bernameyê Taybetî yê Medya Haberî de rojdem ercna. 

Qiseykerdişê Karasuyî ra tay noqtayê girîngî wina yê:

''Vera tecrîdê serê Rayber Apoyî şarê ma xîret keno ke bi têkoşînî tecrîdî bişikno û azadîya Raybr Apoyî bîyaro ca. Dewleta tirke vera Rayberê ma bi tecrîdî polîtîkaya qirkerdişî ana ca. Pêro kurdî, roşnvîrî û sîyasetmedarê kurdî ganî na raştîye bivînê. Şarê ma seba azadîye têkoşîn keno û têkoşînê vera tecrîdî zî parçeyêkê nê têkoşînî yo girîng o. Ewro teyna kurdî ney pêro şarê dinya, hêzê demokrasî, sosyalîst, şorişgêrî zî vînenê ke azadîya Rayber Apoyî yena çi mana. 

Îtalya de seba azadîya Rayber Apoyî konserêk ame kerdene. Nê konserî bi xo mojna ke azadîya Rayber Apoyî seba şaranê dinya çend girîng a. Çew nêeşkeno têkoşînê seba azadîya Rayber Apoyî vindarno. Çew nêeşkeno fikranê Rayber Apoyî tecrîd bikero. Fikrê Rayber Apoyî pêro dinya rê vila benê. 

Ez embaze Sara û Rûkene ke par nê çaxî Mersîn de çalakîya fedayîye kerdbî, bi rêzî yad kena. Înan çalakîyêka tarîxîye kerde. Şexsê embaze Sara û Rûkene de raştîya cinîya kurde, komelê kurdan, têkoşînê vera kolonyalîzmî, qerardarîya azadîye, fedakarîye ameyî mojnayene. Tewirê embaze Sara û Rûkene tewirê gerîlayan temsîl keno. Gerîlayî ewro Herêmanê Pawitişî yê Medya de bi fedayîtî şer kenê. Embaza ma Sara û Rûkene cayê binê serdestîya polîsan de çalakîya fedayîye kerde û ganê xo da. Ganî ciwan û cinîyî wayîrê tewirê embaze Sara û Rûkene vejîyê. 

Zap, Metîna û Avaşîn de gerîlayî bi fedayîtî şer kenê. Dewleta tirke nêeşkaye vera gerîlayan nê waran de netîce bigêrê û PDKyî de hemkarîye kerde. Çîyo ke PDK keno her cayê dinya de sey îxanetî yeno ercnayene. Nêbeno ke merdim bi hawayêkê nermî nêzdîyê nê tewirê PDKyî bibo. Vera PDKyî tewiro qîm nêno girewtene. No qelsîya kurdan a. Eke kurdî vera îxanetî tewir bigêrê azadîya xo do bivisnê destî. 

Tay kesî îxanetê PDKyî meşrû vînenê. PDK ho hêrişê destkewteyanê kurdan keno. Têkoşînê azadîye yê kurdan 50 serran de erjê pîlî û destkewteyê girîngî vistî destî. Eke têkoşînê gerîlayan ra nêbîyêne statuyê Başûrê Kurdîstanî zî çin bîyêne. Xora şarê Başûrî seba azadîya xo têkoşîn kerd la PKK û Rayberîye zî paştî daya înan.

Silopîya de polîsan hêrişê çalakîya vera PDKyî kerd. Bi nê hawayî dewleta tirke mojna ke têkilîya ci ya bi PDKyî senîn a. Dewleta tirke eke PKKyî tasfîye bikera dore do bêra PDKyî. Wa çew xo nêxapîno. Dewleta tirke teyna dişmena PKKyî ney dişmena pêro kurdan û partîyanê kurdan a. 

Şorişê Jin, Jiyan, Azadî serrêke xo pey de verdaya. Ez şexsê Jîna Emînî de pêro şehîdanê nê şorişî yad kena. Cinîyan ê kurdan sey her wextî nê şorişî de zî erkê serkêşîye ard ca. Şarê Rojhelatê Kurdîstanî û Îranî azadîya xo wazenê. Rejîmê Îranî ganî bi hawayêkê cîyayî hînî nêzdîyê cinîyan û komelî bibo. Bi teda û şîdetî çîyêk çareser nêbeno. Şaş o ke dewleta Îranî nê serewedaritişî sey mudaxeleyê hêzanê teberî bivîna. Ganî dewleta Îranî bi hawayêkê raştî nê serewedaritişê cinîyan û komelî biernca û meseleyan bi demokrasî çareser bikera.''