Dima ke lîderê mafya û paramîlîterê dewleta tirke Sedat Pekerî pê tay vîdeoyan têkilîyê dewlete û çeteyan eşkera kerde mekanîzmaya 'şerê taybetî' (gayrî nîzamî) ya dewleta tirke reyna bîye babeta nîqaşî. Endamê Konseya Rayberdişî ya KCKyî Mustafa Karasuyî derheqê babete de ANFyî rê qisey kerd. Beşê diyînî yê roportajê Karasuyî ra qismêk wina yo:

''Îfşayê Sedat Pekerî zaf girîng ê. Dewlete tim çeteyanê ke pê karê xo yê lêminî kena werte ra wedarnena. Sey Topal Osmanî dewlete waşto Sedat Peker zî wedarna. Eşkera yo ke semedo ke Suleyman Soyluyî sozê xo ci rê nêardo ca Sedat Peker nê îfşayan keno. Reyna aseno ke dima ke Alattîn Çakici vejîyayo teber Peker ame peygoşkerdene. Mabênê nê çeteyan de zî pêkewtişêk esto. Esasê nê têkilîyan de şerê înan ê vera kurdan esto. Hema zaf gureyê înan ê pîsî do vejîyê werte.

Dewlete tim bazirganîya eroîn-kokaînî rê destûr daye. Ame îsbatkerdene ke serranê 90an de wextê Tansu Çîllere de dewlete seba ke şer fînanse bikera bazirganîya eroînî kerda.Ewro zî no şero lêşin pê pereyê eroînî fînanse beno. Erdogan pê destê lajê Bînalî Yildirimî bazirganîya eroînî keno. Cergê Sûrîye yê Tirkîya zî pê nê pereyî fînanse benê.

Ma cara zanayêne û vatêne ke Mehmet Agarî xeylêk faîlî meçhûlî serûber kerdî û fermanê ci dayî. Agarî xeylêk kurdan rê gefî wendî û tira xerac girewtî. Ma nika Pekerî ra musayî ke Agar hema zî nê karanê lêminan keno. Agar pê dişmenîya vera kurdan berz beno. Îfşayê Pekerî mojnenê ke mîyanê dewlete de kar û gureyî hol nîyê. No zî serkewtişê kurdan û hêzanê demokrasî yê. Çunke eke nê hêzî tasfîya bibîyêne çewî ra vengêko cîya nêvejîyayêne.

Ugur Mumcu hetê nê çeteyan ra kişîya. Pekerî îtîraf kerd ke xeylêk merdimê karî yê kurdî hetê kontragerîlayan ra kişîyayî û peyê nê kontragerîlayan de zî Mehmet Agar esto. Pekerî îtîraf kerd ke Kutlu Adali hetê Korkut Ekenî ra kişîyayo. Xora Qibris bîyo warê mafyayan, kontrayan.

Wextê AKP-MHPyî de hêrişê vera kurdan, hêzanê demokrasî resayî asta tewr berze. Hende teda, teror û şîdet esto ke zîndanî bîyê pirr. Soylu vano Tirkîya de wextê ci de îşkence nêame kerdene. La kurdî her roje maruzê îşkenceyî manenê û emrê nê îşkenceyan Soylu dano. Her roje vera HDPyî kerdişê xirabî estê. Roboskî, Serebûtê Kobanê pêro wextê înan de qewimîyayî. Qirkerdişê Kemal Korkutî, îşkenceyê helîkopterî, Qirkerdişê Keyeyê Şenyaşarî, Dêrsim de qirkerdişê ciwanêkî... Wina zaf cînayetê înan estê. Zîndanan de zî 5-6 serrî yo îşkence, kerdişê xirabî, bêhuqûqîye, binpaykerdişê heqan zêdîyayî.

Erdogan û gladîoyê qesre mesuldarê pêro karan ê lêminan ê. Mafya, çeteyî binê mesuldarîya Soyluyî de yê, Agar û Çîllere paştî danê nê îqtîdarî. Hayîya Erdoganî pê nê karanê lêminan esta û pêro karê lêminî, îlegalî û sûcî pê fermanê Erdoganî yenê kerdene. Dişmenê demokrasî û kurdan dormeyê nê îqtîdarî de ameyî yewca.

Rayber Apoyî seba Erdoganî vatbi 'No mêrik Çîllere ra hîna zêde bitehluke yo.' Wextê pêvînayîşanê prosesê çareserîye de Îmrali de Rayber Apoyî vatbi 'Wa çew pê Erdoganî tam bawer nêkero.'

Dewleta tirke dewletanê bînan ra cîya ya çunke a dewleta şerê taybetî ya. Esasê nê şerî de zî meseleya kurdan esta. Dewlete de seba qirkerdişê kurdan mekanîzmaya darbe esta. Rayber Apoyî 2015 de vatbi eke şima na mesele çareser nêkerê mekanîzmaya darbe do bikewa dewre. Xora nê şerê taybetî yê vera kurdan dewlete kerd lêşine.

5-6 serranê peyênan de şerê vera kurdan hende bîyo lêşin ke pêro karê mafaya û çeteyan bîyê legal. Nika kam dişmenîya kurdan keno o meqbûl o. Sedat Peker, Korkut Eken, Mehmet Agar, Alattîn Çakici û ê kesê bînê ke karê pîsî yê dewlete kenê nika bîyê hemkarê nê îqtîdarî. Heta ke meseleya kurdan çareser nêba dewlete wina mîyanê lêşinîye de bixeniqa.

Tecrîd parçeyêkê şerê taybetî û Planê Çinkerdişî yo. Rayber Apo 50 serrî yo vera na dewlete şer keno û aye hol şinasneno. Rayber Apoyî key dewlete biba mafya û çete dîye û şîyar kerd. Dişmenê kurdan û demokrasî nêwazenê Rayber Apo qisey bikerê coka wazenê tecrîd dewam bikero. Eke tecrîd bêro şiknayene gladio, çete û mafyayî do bêrê çinkerdene. Nê çete û mafyayî fikrê Rayber Apoyî de peynîya xo vînenê. Çunke fikrê ey do meseleya kurdan çareser bikero û Tirkîyaya demokratîke bîyaro ca. Nê prosesî de ganî wedaritişê tecrîdî, weşî û asayîşê Rayber Apoyî hîna zêde bibo rojdem.

Xora nê mabênî de xoverdayîşê Têgêrayîşê Azadîye îqtîdarî keno gêj. Xoverdayîşê ma şino zorê hêzan ê mîyanneteweyîyan zî. Nika na rewşe bikera ke îqtîdarê AKP-MHPyî do qels biba û verê demokratîkbîyayîşî abikera.

Ganî hêzê demokrasî nê prosesî de têkoşînê xo xurtêr bikerê û vera îqtîdarî vejîyê. Aseno no îqtîdar do pê weçînayîşî nêşoro. Tewirê ke Suleyman Soyluyî, Devlet Bahçelîyî, Tayyîp Erdoganî û gladîoyê qesre îfşayanê Pekerî ra dima mojnayî karakterê nê îqtîdarî eşkera kerd. Coka ganî têna seba îstîfa veng nêro dayene Soyluyî. Ganî pêro hêzê demokrasî wurzê payan ser û bikerê ke îqtîdar bi temamî îstîfa bikero. Eke hêzê muxalîfî û demokrasî nê esasî ser de bêrê pêser îqtîdar nêeşkeno payan ser o vindero. O çax verê îdareyê demokratîkî zî do abibo.''