Endamê Konseya Rayberdişî ya KCKyî Mustafa Karasuyî Medya Haber TVyî de xoverdayîşê gerîlayan, serrgêra Komployê Mîyanneteweyî û rojdem ercnayî.

Qiseykerdişê Karasuyî ra tay noqtayê girîngî wina yê:

''Ma hê serrgêra 25ine ya Komployê Mîyanneteweyîyî de yê. 25 serrî yoo zîndan de vera Rayber Apoyî bi her hewayî teda û îşkenceyê psîkolojîkî yenê kerdene. Nê 25 serran de şarê kurdî û dostanê înan seba azadîya Rayber Apoyî têkoşînêko pîl kerd. Bi taybetî şehîdanê xoverdayîşê 'Şima nêeşkenê tîja ma tarî bikerê' têkoşînê vera komployî rê kedêka pîle daye. Ewro zîndanan de tepişteyî seba azadîya Rayber Apoyî grevê vêşanîye kenê. Tepişteyî bi zelalî vanê ke 'Ma cuya bê Rayberîye qebul nêkenê.'

Rayber Apoyî 15ê Sibate sey 'Roja Qirkerdişê Kurdan' pênase kerdbi. Nika 17ê sibate de Koln de yew rayraşîyayo merkezî yeno plankerdene. Ez venga şarê ma û pêro dostanê ma dana ke bi xurtî tewrê nê rayraşîyayîşî bibê. 

Hêzanê komplogeran û dewleta tirke vatêne qey bi Komployê 15ê Sibate Rayberîye çin bikerê, PKKyî tasfîye bikerê û şarê kurdî qir bikerê. La nê 25 serran de PKK vera bi pîlêr, şarê kurdî bi bihêzêr û fikrê Rayberîye vilayê pêro dinya bîyê. Şarê ma bi xurtî wayîrê Rayberîya xo vejîya. Hetê bînî ra Rayber Apoyî zîndan de paradîgmaya neteweya demokratîke, ekolojîke û azadîgîrîya cinîyan afernaye. Bi na paradîgma Rayberîye sebebê Komployê Mîyanneteweyîyî pûç kerdî û bi nê hawayî komplogeran ra qesaso tewr pîl girewt.

10ê teşrîna verêne de xeylêk merkezanê dinya de Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' dîyabî destpêkerdene. Ganî çarçewa na hemle de têkoşîn bêmabên bêro kerdene. Çunke azadîya Rayber Apoyî azadîya kurdan a. 

Zîndanan de embazê ma bi grevê vêşanîye ancî wayîrê Rayber Apoyî vejîyenê. Ez xoverdayîşê embazanê ma selam kena. Ganî şarê ma û keyeyê tepişteyan bi xurtî wayîrê grevê vêşanîye vejîyê û tepişteyan teyna war nêverdê. 

Ez qurbananê Erdlerzê 6ê Sibate bi rêzî yad kena. Heyf ke nê erdlerzî de ma dî ke şar bêwayîr o. Dewleta tirke doneyê raştikênî yê netîceyanê nê erdlerzî nimitî. La ganî raştîyî bêrê eşkerakerdene ke goreyê ci tedbîrî bigêrîyê. Îqtîdar bi dejanê erdlerzî yarîyan keno, vano 'ez do şima rê keyeyan viraza.' Eke îqtîdarî tedbîrî bigirewtêne netîceyê erdlerzî wina nêbîyayêne. Coka ganî hesabê ney îqtîdarî ra bêro persayene. Îqtîdarê AKP-MHPyî û dewleta tirke mesuldarê netîceyanê Erdlerzê 6ê Sibate yê. Îqtîdarî şar kerd qurbanê polîtîkayanê xo yê rantî. 

Weçînayîşê herêmîyî girîng ê. Verweçînayîşê ke DEM Partî Vakurê Kurdîstanî de kerdî seba averşîyayîşê demokrasîyî gamêka tarîxîye bîyî. Şarê kurdî ancî mojna ke ê senî wayîrê demokrasîyî vejîyenê. Xora sîyasetê kurdan sîyasetê Tirkîya rê beno nimûne. Meseleya kurdan bi demokrasîyî çareser bena. Coka ganî demokrasî bêro averberdene. Weçînayîşê herêmîyî parçeyê têkoşînê demokrasîyî yê. Ganî verweçînayîşan de ancî şarê kurdî îtîfaqî bikero. Çunke îtîfaqî têkoşînî xurt kenê. 

Gerîlayan menga çeleyî de çalakîyê pîlî kerdî û pêser derbî dayî artêşa îşxalkere ro. Îqtîdarê AKP-MHPyî raştîya netîceyanê çalakîyanê gerîlayan şarî ra nimite. Gerîlayî 50 serrrî yo koyan de têkoşîn kenê; yanî wayîrê tecrubeyan ê. Gerîlayî hêzê fedayî yê. Seke Rayber Apoyî vatbi 'Teknîko tewr pîl merdim ê.' Ha wina dewleta faşîste pê gerîlayan nêeşkena. Operasyonanê Şorişgêran dewleta tirke şaş kerde. 50 serrî yo dewlete vana ke 'tay mend ke ma gerîlayan biqedînê.' La dewlete xo bidirna zî ciwanê kurdî do xo ver bidê. Şarê kurdî xora tim hetê gerîlayan de yo. Têkoşînê 2023yî 2024 de bêmabên do dewam bikero. Xora dewleta tirke seba ke gerîlayan bin bivisna ancî do pêro rayîran bişuxilna la ancî do ser nêkewa.  Hetê bînî ra hemkarîya PDKyî ya bi dewleta tirke zî dewam kena. PDK nêverdena ke erzaq û malzemeyî biresê gerîlayan. PDK verê gerîlayan gêno. Dewleta tirke vana qey bi destekê PDKyî verê gerîlayan de netîce bigêra la do wina nêbo.''