Fermandarê Qerargehê Merkezê Pawitişê Şarî (MPŞ) Murat Karayilanî bi wesîleya 15ê Tebaxe cewab da persanê ANFyî. Beşo yewin ê roportajê Karayilanî ra tay qismî wina yê:

''Gerîlayî metodê şer û xoverdayîşî yê şarêkî yan zî komelêkê bindestan o ke erdê înan ameyo îşxalkerdene, vera hêzanê serdestan ê wayîrê artêşanê pîlan ê. Şerê gerîlayan şerêko stratejîk o ke bi yewinanê qijan serê bingeyê taktîkê piroda-bireme de dişmenî aciz keno, game bi game xo rêxistin keno, hêvî dano komelî, rêxistinbîyayîşê komelî de rolêkê pîlî kay keno. Gerîlatîye vera îşxalî hêverî Spanya de şikl girewt. Şerê gerîlayan zî hetê Lîderê Şorişê Çînî Mao Zedungî ra ame kerdene bi esasê Şerê Şarî yê Şorişgêrî.

Kurdîstan de şerê gerîlatîye ra zêdeyêr verî şerê meydanî ameyêne kerdêne. La nê şerî bênetîce mendî û kurdî nê şeran de bin kewtî. Bi taybetî Terteleyê Dêrsimî ra dima Kurdîstan de Planê Şark Islahatî ame vistene dewre, asîmîlasyon û planê qirkerdişê sipîyî ameyêne kerdene. O çax şarê kurdî mîyanê buhranî de bi. 

O çax pêro dinya de, Tirkîya û Kurdîstan de têgêrayîşê ciwanan aver şîyayêne. Rayber Apo proesêkê winasênî de vejîya werte. Vejîyayîşê ey destpêkê prosesêkê tarîxîyî. Qirkerdişê vera kurdan vila bibi, kurdî parçe bibîyî. O çax Rayber Apo û şerê gerîlatîye vejîyayî werte. Seba şerê gerîlatîye zaf nimûneyî çin bîyî. Darbeya 12ê Êlule ra dima ruhê xoverdayîşê Zîndanê Amedî zî no şer qetî kerd. 

Bi ked û xîretê Rayber Apoyî, bi serkêşîya embaz Egîdî 15ê Tebaxa 1984î de Dih û Şemzînan de gamêke dîyaye destpêkerdene û na game bîye mîladê kurdan. Prosesê 15ê Tebaxe prosesê xoverdayîşê gerîlayan o. Yanî 15ê Tebaxe de hêriş nê xoverdayîş-xopawitiş dîya destpêkerdene. Beşê çeke yê na hemle sembolîk o. Na hemle de êyê esasî beşê estbîyayîşê neteweyî, îdeolojîk, rêxistinî yê yanî pakerdişê zincîrê koletîya kurdan o. Coka 15ê Tebaxe sey 'Guleyo verêne erzîya koletîye' yeno ercnayene. 

Komel cade tewrê nê prosesî nêbi; verî ewnîya ci ra, ercna. Key komelî dî ke no xoverdayîş ho beno pîlêr tewrê ci bi û komelî gerîlayî sey xelisnayoxan dîyî. O çax şarê kurdî vejîya meydanan, serewedaritişî dayî destpêkerdene yanî gandar bi. Coka 15ê Tebaxe rê Roşanê Gandarbîyayîşî vajîyeno. Hemleya 15ê Tebaxe tarîtîye de tavistişê çeqî yo, roşnîbîyayîş o, hêvî û vurîyayîşê perspektîfê şorişgêrî yo. Coka pa 15ê Tebaxe têna zincîrê koletîye nêameyê şiknayene heman wextî de şorişêko fikrî, sîyasî û komelkî zî qewimîya. Komelo ke verê mergî de bibi, ame xo ser û bi komelêk ke fikrîyeno, şer keno û xo ano raşt. 

Kurdîstan de şerê gerîlatîye wina rehet pratîze nêbi. Bi taybetî şehadetê embaz Egîdî ra dima gerîlayî tay mend ke tasfîye bibîyêne. Ma o çax Kongreya Hîrêyîne viraşte û hemleyêka newîye kerde. La şehadetê fermandaranê ma yê sey Bedran û Erdalî ra dima meylê sey 'Çar Cergan' vejîyayî werte û têkoşînê zereyî dest pêkerd. O çax eke xeta Rayberîye bi hawayêkê tamî biameyêne caardene netîceyî do cîya bibîyêne. Yanî o çax ferasetê komelî, xeta tasfîyekere ra semed xeta gerîlatîye qismêk ameye caardene.

Pa Hemleya 15ê Tebaxe xeta gerîlatîye Kurdîstan de reya verêne bîye xetêka xoverdayîşî. Şerê gerîlatîye yê Kurdîstanî Rojhelatê Mîyanênî de zî şero verên ê gerîlatîye bi. Yanî kêmasîyê ci est bîyî zî o çax şerê gerîlayan Kurdîstan de polîtîkayê kolonyalîst-qirkerî pûç kerdî. Şerê gerîlayan reyde ruhê yewîya neteweyîye zî aver şi. Hemleya 15ê Tebaxe yanî şerê gerîlayan ra dima meseleya kurdan seba çareserîye kirişîyaye masa. Coka Rayber Apoyî Adirbirnayîşê 'Newroza 93yî' îlan kerd. Ê çaxî ra nata 29 serrî yo ge ge adirbirnayîş ame îlankerdene zî têkoşînê gerîlayan seba ke dewleta tirke polîtîkaya qirkerdişî ra fek vera nêdana dewam keno. Seba ke dewleta tirke waştişê kurdan qebul nêkerdî şerê gerîlayan hende dewam kerd. Nêbo cara şerê gerîlayan hema destpêk de ser kewtbi. 

 Hêzê Xelisnayîşî yê Kurdîstanî (HRK) awanîya leşkerî ya verên a ke nameyê Kurdîstanî ser o ronîyaya. HRKyî pa 15ê Tebaxe ronîyayîşê xo îlan kerdbi û bezreyê gerîlatîye HRKyî reyde erzîyayî. Hemleya 15ê Tebaxe ra dima Kongreya Hîrêyîne de yanî 1985 de ma dî ke şerê gerîlayan ser o tay teredutî est ê, yew qelsîye qewimîyena. O çax seba ke ma şexsê embaz Egîdî de vîrameyîşê pêro xoverdayîşan bipawê, heqê teredutan ra bêrê û xeta têkoşînî zixm bikerê ma tay birî girewtî. Esasê nê biran ser de ma Artêşa Xelisnayîşê Şarî ya Kurdîstanî (ARGK) naye ro.

ARGKyî heta 1999î xo resna astêke. 1999 de tay kêmasîyan ra semed Komployo Mîyanneteweyî qewimîya û Rayber Apo bi esîr. Xora 1998 de Kongreya Pancine de cara tay vurîyayîşê îdeolojîkî est bîyî. O çax sosyalîzmo reel zî rijîyabi coka Rayberîye mîyanê vurîyayîşê paradîgma de bîye. Rayberîye vurîyayîşo paradîgmal Komployê Mîyanneteweyî reyde kerd rojdem. Dima ke paradîgmaya newîye yanî paradîgmaya komelê ekolojîk, demokratîk û azadîgîrê cinîyan vejîya werte warê leşkerî de zî vurîyayîşêk qewimîya. Bi nê hawayî Kongreya Hewtine de HPG ronîya.

Rayber Apoyî bingeyê na paradîgma de wina ercna ke şer de têna gerîlayî nê komel zî ganî bi aktîfî têbigêro û naye ser o yanî pawitişî ser o HPG ronîya. HPG esasê şerê hemparî yê şar û gerîlayan ser de şiklêk girewt. HPG yew awanîyêka pawitişî ya şarî ya ke çareserîya demokratîke xo rê kena esas, xo sey hêzê pawitişê meşrûyî vînena û newe ra awanbîyayîşî zî xo rê kena esas.''